Ağdam Y.Rzayevin başçılıq etdiyi batalyonun qərargah rəisi xəbər verir:İyunun 8-də gündüz saat 15-də rayonun Qaraçı qəbristanı deyilən yerdəki postlarımız Əsgəran səmtindən tank və PDM-lərdən atəşə tutulmuşdur.

Respublikamızın sərhəd bölgələrində vəziyyət gərgin olaraq qalır.

Naxçıvan İyunun 7-də axşamdan başlayaraq iyunun 9-da səhərədək Sədərək qəsəbəsinin müdafiə postları avtomat və pulemyotlardan atəşə tutulmuşdur.

Qazax İyunun 7-dən 8-nə keçən gecə saat 17:00-dan başlayaraq fasilələrlə indiyə kimi Aşağı Əskipara, Quşçu Ayrım, Qızılhacılı, Fərəhli, Cəfərli, Abbasbəyli və Balacəfərli kəndləri Ermənistanın İcevan və Noyemberyan rayonları ərazisindən toplardan atəşə tutulmuşdur.

İyunun 7-də - Azərbaycan Respublikası Prezidentliyinə seçkilərin keçirildiyi gün, müharibə gedən sərhəd bölgələrində əvvəlki günlərlə müqayisədə nisbətən sakitlik olmuşdur.

Naxçıvan Bu gün Naxçıvan Muxtar Respublikasının ərazisində nisbi sakitlik olmuşdur.

Zəngilan İyunun 5-dən 6-na keçən gecə rayonun Seyidlər və Qazançı kəndlərində ara-sıra atəş səsi eşidilmişdir.

İyunun 5-dən 6-na keçən gecə Respublikamızın sərhəd rayonlarının ərazisi Ermənistan istiqamətindən müxtəlif səmtlərdən atəşə tutulmuşdur.

Naxçıvan Bu gün Sədərək qəsəbəsi kiçik Mil yüksəkliyindən və şərab zavodu ərazisindən ZTR, PDM, pulemyot və snayperlərdən atəşə tutulur.

Dünən axşam Zəngilan rayonunun Seyidlər və Burunlu kəndləri; Qubadlının sərhəd kəndləri; Naxçıvan Muxtar Respublikasının Sədərək rayonu; Ağdam rayonunun Gülablı və Əhmədavar kəndləri; Cəbrayıl rayonunun mərkəzi; Kəlbəcərin Söyüdlü məntəqəsi; Goranboyun Zeyvə və Şəfəq kəndləri; Tərtər rayonunun Seydimli kəndi müxtəlif növ silahlardan atəşə tutulmuşdur.