Oktyabrın 4-də saat 23:15-də Ermənistan Silahlı Qüvvələrinin bölmələri Sisian rayonu sahəsində yerləşən mövqelərindən Azərbaycan Silahlı Qüvvələrinin Naxçıvan MR-sı Şahbuz rayonunun Biçənək yaşayış məntəqəsi sahəsindəki mövqelərini zenit-pulemyot qurğularından atəşə tutmuşlar.

Oktyabrın 1-də saat 21:50-də Ermənistan Silahlı Qüvvələrinin Naxçıvan Muxtar Respublikası Şərur rayonunun Yuxarı Yaycı kəndinə əks mövqelərdə yerləşən (Yexeqnadzor rayonunun ərazisi) bölmələrinin 6 nəfərlik kəşfiyyat qrupu Azərbaycan Silahlı Qüvvələrinin yuxarıda göstərilən mövqelərinə soxulmağa cəhd göstərmişdir.

Müdafiə Nazirliyi oktyabrın 5-də saat 15:00-da Həzi Aslanov adına Mərkəzi Zabitlər evində (S.Vurğun küçəsi,12) kütləvi informasiya vasitələri üçün Respublika Prezidentinin 14 sentyabr tarixli Fərmanına uyğun olaraq, “Azərbaycan Respublikası vətəndaşlarının 1998-ci ilin oktyabr ayında həqiqi hərbi xidmətə çağırışı” mövzusunda mətbuat konfransı keçirir.

Sentyabrın 30-da Azərbaycan Respublikasının Müdafiə naziri general-polkovnik Səfər Əbiyev NATO-nun Baş Katibi cənab Havyer Solananı 2 dəfə Sovet İttifaqı Qəhrəmanı Həzi Aslanov adına Bakı Ali Birləşmiş Komandanlıq Məktəbində qəbul etmişdir.

Sentyabrın 30-da Füzuli rayonunun Ermənistan Silahlı Qüvvələri tərəfindən işğal olunmuş sahəsində Ermənistan-Azərbaycan qoşunlarının təmas xəttində ATƏT-in hazırki sədrinin şəxsi nümayəndəsi Anjey Kaspşikin rəhbərliyi altında və səhra komandirlərinin köməyilə monitorinq keçiriləcəkdir.

Sentyabrın 27-də saat 20:05-dən 20:30-dək Azərbaycan Silahlı Qüvvələrinin Naxçıvan Muxtar Respublikası Ordubad rayonu sahəsindəki mövqeləri, Ermənistan Silahlı Qüvvələrinin əks mövqedə yerləşən bölmələri tərəfindən atıcı silahlardan atəşə tutulmuşdur.

Sentyabrın 28-də saat 04:30-da Ermənistan Silahlı Qüvvələrinin 15-20 nəfərdən ibarət kəşfiyyat qrupu Ağdam rayonunun işğal olunmuş Seyidli kəndi istiqamətindən Azərbaycan Silahlı Qüvvələrinin həmin rayonun Qaradağlı kəndi sahəsindəki mövqelərinə soxulmağa cəhd göstərmişlər.

Sentyabrın 24-də saat 20:55-də Ermənistan Silahlı Qüvvələrinin bölmələri Yexeqnadzor rayonunun Barsruni yaşayış məntəqəsinin qərbində yerləşən mövqelərindən Azərbaycan Silahlı Qüvvələrinin Naxçıvan MR-nın Babək rayonunun Aşağı Buzqov kəndi sahəsindəki mövqelərini atıcı silahlardan atəşə tutmuşlar.

Azərbaycan Respublikası və NATO arasındakı fərdi proqrama uyğun olaraq, “Sülh Naminə Tərəfdaşlıq” proqramı çərçivəsində sentyabrın 28-dən 30-dək Çester şəhərində (Böyük Britaniya) tərəfdaş dövlətlərin “Aviasiya silahları sistemi, onların imkanları və inteqrasiyası” mövzusunda simpozium; Sentyabrın 28-dən oktyabrın 2-dək Balaton şəhərində (Macarıstan) NATO-nun “Krizislərin idarəolunması” regional kursları keçiriləcəkdir.

Sentyabrın 23-də saat 21:55-dən 22:35-dək Ermənistan Silahlı Qüvvələrinin bölmələri Yexeqnadzor rayonunun ərazisində yerləşən Mehridağ yüksəkliyindəki mövqelərindən Azərbaycan Silahlı Qüvvələrinin Naxçıvan MR-nın Şərur rayonunun Aşağı Yaycı kəndi sahəsindəki mövqelərini atıcı silahlardan atəşə tutmuşlar.İtki yoxdur.