NATO ilə Azərbaycan Respublikası arasında imzalanmış fərdi proqrama uyğun olaraq, "Sülh Naminə Tərəfdaşlıq" proqramı çərçivəsində Brüssel şəhərində (Belçika Krallığı) fevralın 13-ü və 14-də hərbi sursatların və partlayıcı maddələrin daşınması və saxlanmasının təhlükəsizliyi məsələləri üzrə ekspertlərin görüşü, fevralın 14-dən 16-dək isə NATO-nun Verifikasiya-Koordinasiya Komitəsinin silahlara nəzarət üzrə görüşü keçiriləcək.

NATO ilə Azərbaycan Respublikası arasında imzalanmış fərdi proqrama uyğun olaraq, "Sülh Naminə Tərəfdaşlıq" proqramı çərçivəsində fevralın 12-dən 16-dək Noyezidl şəhərində (Avstriya) "Kooperativ Kiy-2001" təlimlərinin ilkin planlaşdırma konfransı, Oberammerqau şəhərində (Almaniya Federativ Respublikası) çoxmillətli qüvvələr üzrə NATO-nun tanışlıq kursları, Brüssel şəhərində (Belçika Krallığı) NATO üzvü və tərəfdaş dövlətlərin tibb qrupu ekspertlərinin görüşü, fevralın 12-dən 23-dək isə İzmir şəhərində (Türkiyə) hava məkanının idarəsi və nəzarəti üzrə kurslar keçiriləcək.

Fevralın 5-də saat 20:30-dan 20:40-dək Ermənistan Respublikası Silahlı Qüvvələrinin bölmələri Murovdağın işğal olunmuş sahəsində yerləşən mövqelərindən Azərbaycan Respublikası Silahlı Qüvvələrinin Goranboy rayonunun Ballıqaya yaşayış məntəqəsi ərazisində yerləşən mövqelərini avtomatlardan atəşə tutmuşlar.

Azərbaycan Respublikası Silahlı Qüvvələri tərəfindən həyata keçirilən axtarış-xilasetmə əməliyyatları nəticəsində keçən ilin dekabr ayında "N" saylı hərbi hissənin sahəsində qar uçqununa düşmüş əsgərlərdən sonuncusu Məmmədov Elşən Məhəmmədiyyə oğlunun (Qəbələ rayonu Hərbi komissarlığından Silahlı Qüvvələr sıralarına çağırılmışdır) cəsədi fevralın 1-də tapılmışdır.

Fevralın 1-də Azərbaycan Respublikasının Müdafiə naziri general-polkovnik Səfər Əbiyev Yunanıstan Respublikasının Azərbaycan Respublikasındakı fövqəladə və səlahiyyətli səfiri Merkurios Karafotiası və hərbi attaşesi Qiorqios Bardamaskosu qəbul etmişdir.

ATƏT-in hazırkı sədrinin şəxsi nümayəndəsinin mandatına uyğun olaraq, yanvarın 31 -də Ermənistan-Azərbaycan cəbhəsinin Qazax rayonunun Balacəfərli yaşayış məntəqəsi sahəsində, qoşunların təmas xəttində monitorinq keçiriləcək.

Yanvarın 23-dən 26-dək Bakıda bu ilin noyabr ayında NATO-nun "Sülh Naminə Tərəfdaşlıq" Proqramı çərçivəsində Azərbaycan Respublikasında keçirilməsi nəzərdə tutulan "Kooperativ Determineyşn 2001" çoxmillətli komanda-qərargah təliminin ilkin planlaşdırma konfransı keçiriləcəkdir.

Yanvarın 15-dən 16-na keçən gecə Azərbaycan Silahlı Qüvvələrinin "N" saylı hərbi hissəsinin ərazisindəki şəhərcikdə məişət zəminində başçavuş Ağayev Taleh Sabir oğlu (11 iyun 1976-cı ildə anadan olub, 22 aprel 2000-ci ildə Beyləqan RHK-dan müddətdən artıq hərbi xidmətə çağrılıb) və əsgər Abdullayev Zöhrab Asif oğlu (4 dekabr 1981-ci ildə anadan olub, 7 yanvar 2000-ci ildə Tovuz RHK-dan hərbi xidmətə çağrılıb) dəm qazından boğularaq vəfat etmişlər.

Yanvarın 17-də Azərbaycan Respublikasının Müdafiə naziri general-polkovnik Səfər Əbiyev NATO-nun Bakıda rəsmi səfərdə olan Baş Katibi lord Corc Robertsonu qəbul etmişdir.

Azərbaycan Respublikasının prezidenti Heydər Əliyevin dəvətilə Rusiya Federasiyasının prezidenti Vladimir Putinin Bakıya rəsmi səfəri zamanı Rusiya Federasiyası Xəzər Donanmasının 5 gəmisi Rusiya Federasiyası Hərbi Dəniz Donanmasının komandanı donanma admiralı Vladimir Kuroyedovun rəhbərliyi altında yanvarın 10-da tədbirlərdə iştirak etmək üçün Bakı buxtasına daxil olmuşdur.