Azərbaycan Respublikasının Müdafiə naziri general-polkovnik Səfər Əbiyevin dəvətilə Rumıniyanın Dövlət naziri - Milli Müdafiə naziri cənab Viktor Babyukun rəhbərlik etdiyi nümayəndə heyəti fevralın 14-də Bakıya rəsmi səfərə gələcəkdir.

Fevralın 10-da Azərbaycan Respublikasının Müdafiə naziri general-polkovnik Səfər Əbiyev ATƏT-in icraçı sədrinin yanında yaradılmış Minsk Konfransı üzrə katibliyin Avstriya nümayəndəsi cənab Andreas Launeri və icraçı sədrin şəxsi nümayəndəsi cənab Anjey Kasprşiki qəbul etmişdir.

Fevralın 8-də Azərbaycan Respublikasının Müdafiə naziri general-polkovnik Səfər Əbiyev NATO Birləşmiş Komandanlığının Cənub-Şərqi Avropadakı Qərargahının rəis müavini general-mayor R.Rıfkı Durusoyun rəhbərlik etdiyi nümayəndə heyətini qəbul etmişdir.

Fevralın 8-də Azərbaycan Respublikasının Müdafiə naziri general-polkovnik Səfər Əbiyev Türkiyə Respublikası Quru Qoşunları Akademiyasının rəisi general-mayor Xəlil Şimşəyi və Türkiyə Respublikası Silahlı Qüvvələrinin Azərbaycan Respublikasındakı attaşesi general-mayor Sadıq Ercanı qəbul etmişdir.

NATO ilə Azərbaycan Respublikası arasında imzalanmış fərdi proqrama uyğun olaraq, “Sülh Naminə Tərəfdaşlıq” proqramı çərçivəsində yanvarın 31-dən fevralın 4-dək Brüssel şəhərində (Belçika Krallığı) hərbi-mühəndis işçi qrupunun 27-ci görüşü, Oberomerqau şəhərində (AFR) çoxmillətli qərargah zabitlərinin və Ankara şəhərində (Türkiyə) NATO-nun “Sülh Naminə Tərəfdaşlıq” proqramı üzrə oriyentasiya kursları keçirilir.

Yanvarın 24-də Bakı şəhərində Azərbaycan Respublikası ilə NATO arasnda fərdi tərəfdaşlıq proqramına uyğun olaraq, “Sülhməramlı əməliyyatların keçirilməsi” mövzusunda kurslar başlanmışdır.

Yanvarın 19-da Azərbaycan Respublikasının Müdafiə naziri general-polkovnik Səfər Əbiyev İran İslam Respublikasının Azərbaycan Respublikasındakı fövqəladə və səlahiyyətli səfiri cənab Əlirza Biqdelini, İran İslam Respublikası Silahlı Qüvvələrinin Bakıdakı sabiq hərbi attaşesi general-mayor Cəlal Mehriban Xoşgunu, yeni təyin edilmiş hərbi attaşesi general-mayor Musa Şəhabini və İran İslam Respublikası Müdafiə Nazirliyinin hərbi attaşelər şöbəsinin rəisi general-mayor Hüseyn Əli Əlanı qəbul etmişdir.

NATO ilə Azərbaycan Respublikası arasnda imzalanmış fərdi proqrama uyğun olaraq, “Sülh Naminə Tərəfdaşlıq” proqramı çərçivəsində yanvarın 17-dən 21-dək Balıkəsir şəhərində (Türkiyə) NATO üzvü və tərəfdaş dövlətlərin iştirakı ilə “Yerüstü texnika üçün yanacaq-sürtkü standartları” üzrə kurslar; yanvarın 19-dan 20-dək isə Brüssel şəhərində (Belçika Krallığı) Dəniz-taktiki işçi qrupunun görüşü keçiriləcəkdir.

Yanvarın 17-də Azərbaycan Respublikasının Müdafiə naziri general-polkovnik Səfər Əbiyev Amerika Birləşmiş Ştatlarının Azərbaycan Respublikasındakı fövqəladə və səlahiyyətli səfiri Stenli Eskuderonu, ABŞ Senatı Xarici Əlaqələr Komitəsinin Milli Təhlükəsizlik Məsələləri üzrə yüksək səviyyəli peşəkar Qərargahın əməkdaşı cənab Marşall Billinqslini və onları müşayiət edən şəxsləri qəbul etmişdir.

NATO ilə Azərbaycan Respublikası arasında imzalanmış fərdi proqrama uyğun olaraq, “Sülh Naminə Tərəfdaşlıq” proqramı çərçivəsində yanvarın 12-dən 14-dək Brüssel şəhərində (Belçika Krallığı) NATO üzvü və tərəfdaş dövlətlərin iştiraki ilə Avropada Adi Silahlı Qüvvələr Haqqında Müqaviləyə və 1994-cü il Vyana sənədinə əsasən illik informasiya mübadiləsinin elektron versiyası (VERİTİ sistemi) üzrə işgüzar görüş keçirilir.