Mayın 7-də Müdafiə Nazirliyinin Həzi Aslanov adına Mərkəzi Zabitlər Evində Azərbaycan Respublikasının Prezidenti, Silahlı Qüvvələrin Ali Baş Komandanı cənab Heydər Əliyevin anadan olmasının 80 illik yubileyinə həsr edilmiş təntənəli mərasim keçirilmişdir.

Mayın 5-də Azərbaycan Respublikasının Müdafiə naziri general-polkovnik S.Əbiyev NATO-nun Cənub-Şərqi Avropadakı Birləşmiş Qüvvələrinin komandanı ordu generalı Oktar Atamanı, komandanlığın Plan-Əməliyyat İdarəsinin rəisi briqada generalı Alan Didi və nümayandə heyətini qəbul etmişdir.

Mayın 1-də Azərbaycan Respublikasının Müdafiə naziri general-polkovnik Səfər Əbiyev Avropa Təhlükəsizlik və Əməkdaşlıq Təşkilatının (ATƏT) Azərbaycan Respublikasındakı səfiri cənab Peter Burxardı və onun müavini cənab Robin Siverti qəbul etmişdir.

ATƏT-in hazırkı sədrinin şəxsi nümayəndəsinin mandatına uyğun olaraq, aprelin 29-da Azərbaycan Respublikası və Ermənistan Respublikası dövlət sərhədinin Qazax rayonunun Aşağı Əskipara kəndi sahəsində monitorinq keçirilməsi planlaşdırılır.

Aprelin 20-də saat 20:20-dən 21:40-dək Ermənistan silahlı qüvvələrinin bölmələri Füzuli rayonunun Alxanlı kəndinin 5,7 km qərbində, işğal olunmuş sahədə yerləşən mövqelərindən Azərbaycan Silahlı Qüvvələrinin həmin kəndin qərbində yerləşən üzbəüz mövqelərini avtomatlardan və pulemyotlardan atəşə tutmuşlar.

Aprelin 18-də Azərbaycan Respublikasının Müdafiə naziri general-polkovnik Səfər Əbiyev Amerika Birləşmiş Ştatlarının NATO Komitəsinin sədri cənab Brus Ceksonu qəbul etmişdir.

Aprelin 15-də saat 22:40-dan 01:15-dək Ermənistan silahlı qüvvələrinin bölmələri İcevan rayonunun Ləliguh yaşayış məntəqəsinin 2 km şimalında yerləşən mövqelərindən Azərbaycan Silahlı Qüvvələrinin Qazax rayonunun Bala Cəfərli kəndi sahəsində yerləşən mövqelərini atıcı silahlardan ara-sıra atəşə tutmuşlar.

Aprelin 14-də Azərbaycan Respublikasının Müdafiə naziri general-polkovnik Səfər Əbiyev Avropa Şurası Parlament Assambleyasının Dağlıq Qarabağ üzrə məruzəçisi cənab Terri Devisi və Siyasi İşlər Komitəsi Katibliyinin əməkdaşı cənab Rudiger Dossovu qəbul etmişdir.

ATƏT-in hazırıkı sədrinin şəxsi nümayəndəsinin mandatına uyğun olaraq, aprelin 15-də Azərbaycan Respublikası və Ermənistan Respublikası dövlət sərhədinin Gədəbəy rayonunun Göyəli kəndi sahəsində monitorinq keçirilməsi planlaşdırılır.

Aprelin 10-da saat 08:00-dan 08:30-dək Ermənistan silahlı qüvvələrinin bölmələri Gədəbəy rayonunun Başkənd aşırımı sahəsində dövlət sərhədindəki yüksəklikdə yerləşən mövqelərindən Azərbaycan Silahlı Qüvvələrinin həmin sahədə yerləşən mövqelərini qumbaraatanlardan, minaatanlardan, pulemyot və avtomatlardan atəşə tutmuşlar.