Hərbi xidmətdə hər bir vəzifənin öz məsuliyyəti var. Ordunun gündəlik fəaliyyətində, şəxsi heyətin daşınmasında və müxtəlif tapşırıqların yerinə yetirilməsində hərbi sürücülərin üzərinə mühüm vəzifələr düşür. Onlar istənilən şəraitdə nəqliyyat vasitəsini idarə etməyə, yol hərəkəti qaydalarına əməl etməyə və verilən tapşırıqları vaxtında yerinə yetirməyə hazır olmalıdırlar. Bu iş diqqət, səbir, peşəkarlıq və yüksək məsuliyyət tələb edir. 

Nizami İmamverdi oğlu Ələsgərov da hərbi xidmətini bu prinsiplər əsasında davam etdirən hərbi qulluqçulardandır. O, 6 avqust 1988-ci ildə Gədəbəy rayonunda anadan olub. Bir çoxları kimi, onun da hərbi mundir geyinmək arzusu olub. Bu arzuya çatmaq üçün çox səy göstərib. 2014-cü ildən hərbi xidmətdə olan Nizami Ələsgərov hazırda sürücü vəzifəsində çalışır. Xidmət etdiyi müddətdə ona həvalə olunan vəzifələrin məsuliyyətini dərk edir, qarşıya qoyulan tapşırıqların yerinə yetirilməsinə çalışır.

Hərbi sürücünün fəaliyyəti yalnız nəqliyyat vasitəsini idarə etməklə məhdudlaşmır. O, avtomobilin texniki vəziyyətinə nəzarət etməli, yürüşə hazırlığını təmin edərək təhlükəsizlik qaydalarına ciddi əməl etməlidir. Xüsusilə mürəkkəb şəraitdə düzgün qərar vermək, diqqətli olmaq və vaxtında hərəkət etmək böyük əhəmiyyət daşıyır. Çünki hərbi tapşırıqların uğurla yerinə yetirilməsi bəzən sürücünün hazırlığından və məsuliyyətindən də asılı olur.

Nizami Ələsgərovun hərbi xidmət yolunun mühüm məqamlarından biri də antiterror əməliyyatında iştirak etməsidir. Belə əməliyyatlarda iştirak etmək hər bir hərbi qulluqçudan fiziki və mənəvi hazırlıq, intizam və verilən tapşırıqlara məsuliyyətlə yanaşmağı tələb edir. Hərbi sürücülər də bu prosesdə üzərlərinə düşən vəzifələri yerinə yetirərək ümumi fəaliyyətə töhfə verirlər. Nizami Ələsgərovun bu əməliyyatların iştirakçısı olması onun xidmət yolunun əhəmiyyətli məqamlarından biridir.

Hərbi xidmətdə göstərilən diqqət və məsuliyyətin qiymətləndirilməsi hərbi qulluqçu üçün xüsusi əhəmiyyət kəsb edir. Nizami Ələsgərov xidmət etdiyi müddətdə hərbi hissə komandirləri tərəfindən təşəkkürnamə və fəxri fərmanlarla təltif edilib. Bu təltiflər onun xidmət fəaliyyətinə verilən qiymətin göstəricisidir.

Orduda xidmət yalnız verilən tapşırıqları yerinə yetirmək deyil, həm də hər gün üzərinə düşən vəzifəyə vicdanla yanaşmaqdır. Hərbi sürücünün sükan arxasında göstərdiyi diqqət, intizam və məsuliyyət ümumi xidmətin etibarlığına təsir edir. Nizami Ələsgərov də 2014-cü ildən davam edən hərbi xidmətində bu məsuliyyəti daşıyan hərbi qulluqçulardandır.

Hüsniyyə NƏSİROVA

“Azərbaycan Ordusu”