Əsgərin gündəlik həyatı yalnız hərbi təlimlərdən, məşqlərdən və xidməti vəzifələrinin yerinə yetirilməsindən ibarət deyil. Asudə vaxtın düzgün təşkili də onun həyatında mühüm yer tutur. Bu vaxtı maraqlı və faydalı məşğuliyyətlə keçirmək həm əhval-ruhiyyəni yüksəldir, həm də yeni bacarıqların inkişafına kömək edir.

Şahmat taxtası arxasında əyləşən iki əsgər - Dünyamin Məmmədzadə və Seymur Mustafayev asudə vaxtlarını belə dəyərləndirirdilər. Şahmat taxtası arxasında üz-üzə əyləşən əsgərlər hər gediş üzərində düşünür, mümkün variantları nəzərdən keçirir, rəqibin növbəti addımını əvvəlcədən müəyyənləşdirməyə çalışırdılar. Bu oyun onlara həm istirahət etmək, həm də düşünmə bacarıqlarını inkişaf etdirməyə imkan yaradırdı.

Əslən Tərtər rayonunun Qaynaq kəndindən olan Dünyamin Məmmədzadə ali təhsillidir. O, Xəzər Universitetində təhsil alıb, bakalavr və magistr pillələrini bitirib. İxtisası “Klinik psixologiya” olan Dünyamin hərbi xidmətə gəlməzdən əvvəl uşaq psixologiya mərkəzində çalışıb. Peşəsi insanları anlamağı, onların davranışlarını müşahidə etməyi və səbirli olmağı tələb edən gənc üçün şahmat da maraqlı məşğuliyyətdir.

Şahmat oyununda tələsmək düzgün nəticəyə gətirib çıxarmır. Hər bir gedişin nəticəsini düşünmək, yaranan vəziyyəti düzgün qiymətləndirmək və qərar vermək lazımdır. Bu baxımdan şahmat insana diqqətli olmağı, səbir göstərməyi və hadisələrə müxtəlif tərəflərdən yanaşmağı öyrədir. Dünyaminin təhsil aldığı sahədə də bu keyfiyyətlərin əhəmiyyəti böyükdür.

Digər həmsöhbətimiz Seymur Mustafayev isə Goranboy rayonunun Qaradağlı kəndindəndir. Azərbaycan Əmək və Sosial Münasibətlər Akademiyasını bitirən Seymur “Maliyyə” ixtisası üzrə təhsil alıb. Onun da şahmata xüsusi marağı var. Bu maraq yalnız boş vaxtını keçirməkdən ibarət deyil. O, rayonda keçirilən şahmat yarışında ikinci yerə layiq görülüb. Bu nəticə onun oyuna marağının və şahmat bacarığının göstəricisidir.

Seymur üçün hər gedişin əhəmiyyətini anlamaq, düzgün qərar vermək və rəqibin taktikasına uyğun hərəkət etmək deməkdir. Maliyyə sahəsində də diqqət, dəqiqlik və hesablamalar mühüm yer tutur. Şahmat taxtası arxasında isə bu bacarıqlar fərqli şəkildə özünü göstərirdi. 

Əsgərlərin şahmat oyunu ilk baxışda sadəcə asudə vaxt məşğuliyyəti kimi görünə bilər. Əslində isə, belə fəaliyyətlər kollektivlə ünsiyyətin möhkəmlənməsinə, yoldaşlıq münasibətlərinin inkişafına və sağlam rəqabət mühitinin yaranmasına kömək edir. Oyunun nəticəsindən asılı olmayaraq hər qarşılaşma yeni təcrübə qazanmaq, səhvləri görmək və növbəti dəfə daha düzgün qərarlar vermək üçün fürsətdir.

Hərbi xidmət zamanı asudə vaxtın səmərəli təşkili əsgərlərin gündəlik həyatına mühüm təsir göstərir. İdmanla məşğul olmaq, kitab oxumaq, intellektual oyunlara vaxt ayırmaq onların həm fiziki, həm də mənəvi inkişafına xidmət edir. Dünyamin Məmmədzadə və Seymur Mustafayevin şahmata marağı bu baxımdan təqdirəlayiqdir.

Şahmat taxtası arxasında hər gediş düşünülür, hər qərarın nəticəsi nəzərə alınır. Əsgərlər üçün bu oyun həm maraqlı istirahət, həm də diqqəti və məntiqi təfəkkürü inkişaf etdirən faydalı məşğuliyyətdir. Beləliklə, onlar hərbi xidmətlərində asudə vaxtlarını səmərəli keçirir, gündəlik xidmət həyatına xoş rəng qatırlar.

Hüsniyyə NƏSİROVA

“Azərbaycan Ordusu”