Bu gün Azərbaycan Silahlı Qüvvələri Qafqazda ən müasir və qüdrətli ordu hesab olunur. İkinci Qarabağ müharibəsi zamanı istifadə olunan döyüş taktikası dünya hərb tarixində yenilikdir. Güclü və qüdrətli ordu dövlətin təhlükəsizlik sütunlarından biridir. Respublikamızın xarici və hərbi siyasət kursunun ən mühüm prioritetlərindən biri dövlətin suverenliyinin, ərazi bütövlüyünün və sərhədlərinin toxunulmazlığının etibarlı şəkildə qorunması, eyni zamanda, Azərbaycan Silahlı Qüvvələrinin müdafiə və döyüş qabiliyyətinin müasir standartlara uyğun olaraq davamlı şəkildə daha da gücləndirilməsidir. 
Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin 11 avqust 2026-cı il tarixində Naxçıvan Muxtar Respublikasına reallaşan növbəti səfəri və səfər çərçivəsində Azərbaycan Televiziyasına (AzTV) verdiyi çoxməzmunlu və tarixi müsahibə ölkəmizin hərbi-siyasi qüdrətini, regional təhlükəsizlik istiqamətindəki aparıcı rolunu və ordu quruculuğunda əldə olunmuş böyük nailiyyətləri bir daha bütün dünyaya nümayiş etdirdi. Naxçıvanın strateji coğrafi mövqeyi, burada yerləşən Əlahiddə Ümumqoşun Ordunun yüksək döyüş hazırlığı və regionda formalaşan yeni geostrateji reallıqlar fonunda dövlət başçısının səsləndirdiyi bəyanatlar Azərbaycan Silahlı Qüvvələrinin Cənubi Qafqazda əsas söz sahiblərindən biri olduğunu, eləcə də sülhün, sabitliyin sarsılmaz təminatçısına çevrildiyini qətiyyətlə bildirdi.
Ali Baş Komandan İlham Əliyevin müsahibəsində xüsusi vurğuladığı kimi, Azərbaycan Ordusunun keçdiyi inkişaf yolu, 44 günlük Vətən müharibəsində qazanılmış tarixi Zəfər və 2023-cü ilin sentyabrında həyata keçirilmiş uğurlu antiterror əməliyyatı təkcə torpaqlarımızın azad olunması ilə nəticələnməmiş, həm də Cənubi Qafqaz regionunda güclər nisbətini köklü şəkildə dəyişdirmişdir. Dövlətimizin başçısı açıq şəkildə bildirdi ki, bu gün bölgədə Azərbaycanın razılığı və iştirakı olmadan hər hansı hərbi-geosiyasi layihənin reallaşdırılması, yaxud xalqımızın milli maraqlarına zidd olan hər hansı təşəbbüsün irəli sürülməsi imkansızdır. Bu reallıq məhz rəşadətli Azərbaycan Ordusunun qəhrəmanlığı, yüksək peşəkarlığı və dövlətimizin malik olduğu sarsılmaz hərbi-texniki potensial sayəsində təmin olunmuşdur. Naxçıvanda verdiyi müsahibədə ölkə rəhbəri ordumuzun son illərdə daha da modernləşdirildiyini, ən müasir silah-sursat və döyüş texnikası ilə təchiz edildiyini, komando birliklərinin və xüsusi təyinatlı qüvvələrin sayının dəfələrlə artırıldığını diqqətə çatdırdı. Bu mütərəqqi addımlar göstərir ki, Azərbaycan postmüharibə dövründə də arxayınlaşmamış, əksinə, hərbi qüdrətini ən yüksək standartlar səviyyəsində saxlamaq üçün ardıcıl strategiya yürütmüşdür.
Naxçıvan Muxtar Respublikası istiqamətində müdafiə qabiliyyətimizin möhkəmləndirilməsi dövlətimizin hərbi strategiyasında hər zaman xüsusi xətt kimi dayanır. Prezident İlham Əliyev müsahibəsində Naxçıvanın hərbi təhlükəsizliyinin ən yüksək səviyyədə təmin edildiyini, Əlahiddə Ümumqoşun Ordunun ən modern silah və sistemlərlə təchiz olunduğunu, hər an istənilən təxribatın və təhdidin qarşısını almağa qadir olduğunu bildirmişdir. Naxçıvan həm də Azərbaycanı Türkiyə və geniş mənada Türk dünyası ilə birləşdirən mühüm strateji platformadır. Dövlət başçısı qeyd etmişdir ki, Azərbaycan ilə Türkiyə arasında imzalanmış tarixi Şuşa Bəyannaməsinə müvafiq olaraq, hərbi sahədəki strateji müttəfiqlik münasibətləri Naxçıvanın da təhlükəsizliyini tam şəkildə sığortalayır. İki qardaş ölkənin hərbçilərinin Naxçıvan ərazisində mütəmadi olaraq keçirdiyi birgə təlimlər regionda hərbi balansı qorumaqla yanaşı, hər hansı revanşist qüvvəyə qarşı çəkindirici amil rolunu oynayır. Bu kontekstdə, Azərbaycan Silahlı Qüvvələrinin bölgədə söz sahibi olması yalnız güc nümayişi deyil, eyni zamanda, regional sülhün, təhlükəsizliyin və Zəngəzur dəhlizi kimi nəhəng kommunikasiya layihələrinin təhlükəsiz icrasının zəmanətidir.
Dövlət başçısının müsahibəsində diqqət yetirdiyi digər mühüm məqam isə Ermənistandakı revanşist meyillər və xarici qüvvələrin bu ölkəni yenidən silahlandırmaq cəhdləri ilə bağlı sərt və qətiyyətli xəbərdarlıqlar oldu. Prezident İlham Əliyev Azərbaycan Televiziyası vasitəsilə bəyan etdi ki, ölkəmizə qarşı hər hansı real təhdid, yaxud sərhədlərimizdə hərbi təxribat hazırlığı müşahidə olunacağı təqdirdə, Azərbaycan Silahlı Qüvvələri adekvat, sürətli və sarsıdıcı addımlar atacaqdır. Dövlətimizin başçısı vurğuladı ki, Ermənistanı silahlandıran və regionda yenidən gərginlik yaratmağa çalışan bəzi qərb dövlətləri bu siyasətin təhlükəli nəticələrini dərk etməlidirlər. Azərbaycan Ordusunun malik olduğu yüksək dəqiqlikli raket sistemləri, Pilotsuz Uçuş Aparatları (PUA) və müasir artilleriya vasitələri potensial düşmənin hər bir addımını anında zərərsizləşdirməyə tam imkan verir. 
Müsahibədə həmçinin milli hərbi sənayenin inkişafı və yerli istehsal hesabına ordumuzun təchizatının artırılması məsələlərinə də toxunuldu. Prezident İlham Əliyev qeyd etdi ki, Azərbaycan xarici ölkələrdən ən müasir hərbi texnika almaqla yanaşı, yerli Müdafiə Sənayesi Nazirliyinin müəssisələrində də ən son texnologiyalara əsaslanan silah-sursat istehsalını kəskin şəkildə artırmışdır. Müdafiə sənayesinin inkişafı hərbi sahədə xarici asılılığı minimuma endirməyə, ordunun maddi-texniki təminatını iqtisadi cəhətdən tam dayanıqlı etməyə imkan verir. Dövlət başçısının qeyd etdiyi kimi, güclü iqtisadiyyat, yerli sənaye potensialı və yüksək vətənpərvərlik ruhu ilə silahlanmış ordu vahid bir qüvvə kimi dövlətimizin sarsılmazlığını təmin edir. Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin 11 avqust 2026-cı il tarixində Naxçıvana səfəri də bu hərtərəfli inkişaf strategiyasının əyani təzahürüdür.
Azərbaycan Televiziyasına verdiyi tarixi müsahibə dövlətimizin milli təhlükəsizlik konsepsiyasının dözümlülüyünü və hərbi strategiyamızın nizamlılığını bir daha nümayiş etdirdi. Səsləndirilən fikirlər bir daha onu göstərdi ki, Azərbaycan Silahlı Qüvvələri Cənubi Qafqazda sabitliyin, sülhün və tərəqqinin ən etibarlı təminatçısıdır. Regionda hər bir siyasi və iqtisadi proses məhz Azərbaycanın hərbi və diplomatik gücü nəzərə alınaraq cərəyan edir. Ali Baş Komandanın uzaqgörən rəhbərliyi, xalqın ordusuna olan sonsuz inamı və ordumuzun yüksək peşəkarlığı sayəsində Azərbaycanın suverenliyi əbədi, sərhədlərimiz keçilməz, regiondakı söz sahibliyi isə sarsılmaz olaraq qalacaqdır. 
Azərbaycan Respublikası Prezidentinin “Azərbaycan Silahlı Qüvvələri bölgədə söz sahibidir” fikri bu mənada həm ölkənin keçdiyi hərbi inkişaf yoluna verilən qiymət, həm də gələcəyə yönəlmiş mesaj kimi qəbul edilə bilər. Xüsusilə Naxçıvanda hərbi potensialın daha da gücləndiriləcəyinin bildirməsi Azərbaycanın təhlükəsizlik və özünümüdafiə siyasətində bu strateji bölgəyə verilən önəmi bir daha nümayiş etdirir.



Lalə HÜSEYNOVA

 “Azərbaycan Ordusu”