Söz kimi heykəltaraşlıq da yaratmaqdı, yaşatmaq niyyətidi. Dədə Qorqud da, Nizami Gəncəvi də, Məhəmməd Füzuli də, Nəsimi də, digər mütəfəkkirlərimiz də sonralar yüz illərin sərhədini sözlə təsvir edilənlər əsasında rənglərin ifadəsi ilə aşa bilmişdi. Yüz illərdi sözünü sevdiyimiz, sözüylə yaşadığımız SÖZ dahilərini gözlərimizə, gözlərimizdən könlümüzə köçürdük. Sonralar onların heykəllərini də gördük, büstlərini də. Onları yaradanlara həmişə bir ürək tutumunca ehtiram ünvanlamışıq. O ehtiram da əbədiyyətin cığırdaşıdı...
Əsgər Asif Yusufov orta məktəbi Mehdiabad qəsəbəsində bitirib. Uşaqlığından heykəl düzəltməyə meyilli olub. Bu meyil onda haradan yaranıb? -  görürmüş, duyurmuş. Plastilindən müxtəlif fiqurlar, qablar düzəldərmiş.
Düzəltdikləri bəyənilərmiş. Sonra müxtəlif heyvanlar, sonra insan büstləri düzəltməyə başlayıb. Düzəltdiyi büstlərdə insanlara xas olan qəzəbi də, sevinci də, qəhəri də, həsrəti də, ... ifadə etməyə çalışarmış. Bir dəfə plastilindən düzəltdiyi büstü görəndə atası təəccüblə soruşub ki, bunu niyə qəmli düzəldibsən. Onda özünə inanıb. İnanıb ki, insanların mimikasını da ifadə edə biləcək. Atasının incə təəccübünü, təəccübə söykənikli heyrətini heykəltaraş olacağına xeyir-dua, xeyir-dua biçimli zəmanət bilib...
Heydər Əliyev adına Sarayda  bacarıqlı, istedadlı şagirdlərin əl işləri sərgisi olacağını ona müəllimi demişdi. "Sən də iştirak elə. Seçim özünün olsun, nə düzəldəcəksənsə. Sevgilərlə düzəlt, iştirak üçün yox, qalib gəlmək üçün düzəlt...", - belə demişdi. Asif bu sərgiyə dahi Nizami Gəncəvinin büstünü təqdim etmişdi. Söz-şeiriyyət dahisinin baxışları uzaqlara dikilib. Elə bil yüz-yüz illərin o üzündən bu günümüzə baxır, Azərbaycanın göylərindən boz buludların dağıldığını görür, yenə, "Üzr istəyən düşmənə inanma, qapından qov!" deyəcək. Asifin yaratdığı büst münsifləri də, sərginin eksponatlarına baxanları da maraqlandırıb, hamı Asif Yusufovun təxəyyülünün Nizami Gəncəvisini, klassik heykəltaraşlıqdan qətiyyən geri qalmayan sənət əsərini yüksək dəyərləndirib. "Nizami Gəncəvi" büstü sərginin qalibi olub. Məktəbli Asif Yusufova diplom verilib. Asif dedi ki, bu diplom məni heykəltaraşlığa yetirəcək yolun başlanğıcı oldu...
Abşeron məktəbliləri arasında keçirilən analoji sərgidə də baş mükafatı Asif Yusufov aldı - sərgiyə Ulu Öndər Heydər Əliyevin büstünü təqdim etmişdi. Əsər olaraq qalib gəldiyi üçün Abşeron rayon İcra Hakimiyyətindədir. Gələnlər görür, müasir Azərbaycanın dövlətçilik memarının bu ümidlə gəldikləri ünvandan sevinclə çıxacaqlar. Bu duyğuları onlara dahi tarixi şəxsiyyətin büstünü yaratmış əsgər Asif Yusufov yaşadır. İcra hakimiyyətinə gələnlər bir kəlamın işığı ilə qayıdır: "Mən həmişə fəxr etmişəm, bu gün də fəxr edirəm ki, mən azərbaycanlıyam". Bu kəlamı onlar da Azərbaycana sevgi düsturu bilir...
Polkovnik-leytenant Elşən Hüseynov hərbi hissədə mənə bir əsgərin yaradıcılığından söz açanda demişdi ki, əsgər İkinci Qarabağ müharibəsində topçulara sevgi kimi bir heykəl yaratmaq istəyir. Ona lazımi kömək göstəriləcək. Sevindim də, qürurlandım da. İşğaldan azad edilmiş ərazilərimizin yaxınlığında xidmət edən əsgərin qabiliyyətinə bir jurnalist kimi necə sevinmişdimsə, onun yaradacağı əsərin mahiyyətinə bir vətəndaş kimi elə sevinmişdim: İkinci Qarabağ müharibəsində qazandığımız tarixi Zəfəri yaşatma niyyəti olaraq dəyərləndirdim. Bu niyyəti onun özünün də, xidmət yoldaşlarının da, Azərbaycan Ordusunun əsgərlərinin də tarixi yaddaşı bildim. O yaddaş mənə 2020-ci il sentyabrın 27-də başlayan ədalətli müharibəmizdə Topçu Vüsal kimi tanınan və sevilən topçu döyüşçü əsgəri xatırlatdı. Asif Topçu Vüsalla yanaşı, həmin topun da heykəlini yaratmağı qərara alıb. Əsgər Vüsalın timsalında müharibədə döyüşənlərimizə, döyüşənlərimizin timsalında ordumuza sevgisini  heykəlləşdirəcək...
Hər yaradılan tarixdir...
Əsgər Asif Yusufovun təfəkkürü əsgər çəkməsində Xarıbülbül göyərdib. Qələbəmizin rəmzlərindən biri kimi qəbul edilməli rəmz illər çəkən niyyətin gerçəkləşməsinin şükranlıq rəmzidir. Əsgər təfəkküründən düşən işıq bilirik bu düşündürücü rəmzi...
Əsgər Asif Yusufovun yaratdıqları da tarixdir...
Əsgər Asif Yusufov tərxis olunduqdan sonra heykəltaraşlığı elmi baxımdan mənimsəyəcək, daha gözəl, daha düşüncəli əsərlər yaradacaq. Onda bu gün onunla xidmət edən əsgərlər qürurla deyəcək ki, Asif Yusufov mənim əsgər yoldaşım olub.
Asif Yusufov nümunəvi əsgərdir. Komandirlərinin tapşırıqlarını, göstərişlərini məsuliyyətlə və vaxtında yerinə yetirir. Gələcəkdə heykəltaraşlığın sirlərini də əsgəri məsuliyyətlə öyrənəcək...

Oruc MUSTAFAYEV

"Azərbaycan Ordusu"