Xalqımızın Ümummilli Lideri Heydər Əliyevin ikinci dəfə siyasi hakimiyyətə qayıdışından sonra əsasını qoyduğu müasir ordu quruculuğu prosesinin Azərbaycan Respublikasının Prezidenti, Müzəffər Ali Baş Komandan İlham Əliyev tərəfindən uğurla davam etdirildiyinin hər addımda şahidi oluruq.
Bu gün Azərbaycan Ordusunun bütün bölmələrində hərbi qulluqçuların nümunəvi xidmət etməsi üçün yüksək sosial-məişət şəraiti yaradılıb, ən müasir silah və texnikaların arsenalımıza daxil edilməsi prosesi davam edir. Hərbi qulluqçuların ərzaq, qida, geyim təminatı da lazımi səviyyədədir. Bunlarla yanaşı, şəxsi heyətin mənəvi-psixoloji vəziyyətinin də yüksək səviyyədə saxlanılması üçün tədbirlər həyata keçirilir. Bütün bu sadaladıqlarımızın hamısı isə döyüş hazırlığına birbaşa müsbət təsir edən amillərdir.
Aparılan uğurlu islahatların nəticəsidir ki, bu gün Azərbaycan Ordusu regionun ən güclüsü, dünyanın güclü orduları sırasında isə öncül yerdədir. İstər keçirilən genişmiqyaslı təlimlərdə, istərsə də digər tədbirlərdə hərbçilərimizin mürəkkəb tapşırıqları müvəffəqiyyətlə yerinə yetirməsi onların döyüş qabiliyyətinin və peşəkarlığının, yeni silah sistemlərindən və döyüş texnikasından istifadə etmə bacarıqlarının yüksək səviyyədə olduğunu göstərir. Ordumuz haqqında deyilən ürəkaçan sözlərin hamısı 2020-ci il sentyabrın 27-də Ermənistan silahlı qüvvələrinin genişmiqyaslı təxribatlarına cavab olaraq başlayan 44 günlük Vətən müharibəsində öz təsdiqini tapmışdır. Qazanılan tarixi qələbə ordumuzun döyüş və mənəvi-psixoloji hazırlığının, maddi-texniki bazasının, şəxsi heyətinin peşəkarlığının göstəricisi oldu.
Müharibənin başa çatmasına baxmayaraq, Azərbaycan Ordusunda şəxsi heyətin döyüş hazırlığının yüksək səviyyədə saxlanılması bu gün də dövlət başçısı və ordu rəhbərliyi tərəfindən daima diqqət mərkəzində saxlanılır. Müdafiə nazirinin təsdiq etdiyi plana əsasən, hərbi hissələrdə və əlahiddə bölmələrdə hərbi qulluqçularla döyüş, atəş, taktiki, ictimai-siyasi, fiziki və s. hazırlıqlardan dərslər səmərəli şəkildə keçirilir. Nəzəri və praktiki dərslərdə şəxsi heyətə hərbi biliklər və döyüş vərdişləri aşılanır. Həmçinin mütəmadi olaraq keçirilən təlimlərdə bölmələrin döyüş qabiliyyəti də yoxlanılır.
Vətən müharibəsində qazanılan tarixi Zəfərdə pay sahibi olanlardan biri də artilleriyaçılarımız idi. Döyüş əməliyyatları zamanı onların dəqiq artilleriya zərbələri nəticəsində düşmənin illərlə möhkəmlətdiyi istehkam sədləri darmadağın edildi. Xeyli sayda canlı qüvvəsi, döyüş maşınları və texnikaları, komanda məntəqələri artilleriyaçılarımızın sərrast atışları ilə məhv edildi. Bir sözlə, İkinci Qarabağ müharibəsində düşmən qüvvələrinin məhv edilməsində, eləcə də qarşı tərəfin əks-həmlə tətbiq edə bilməməsində artilleriya bölmələrimizin rolu böyük oldu. Hal-hazırda da ordumuzun bütün qoşun növlərində olduğu kimi, artilleriya bölmələrində də mütəmadi olaraq uğurlu döyüş əməliyyatlarında qazanılan təcrübəyə əsaslanaraq təlimlər keçirilir, şəxsi heyətin döyüş hazırlığı daha da təkmilləşdirilir.
"N" hərbi hissəsinə gəlişimiz artilleriya bölmələrinin təliminə təsadüf etdi. Plana uyğun olaraq bölmələr daimi dislokasiya məntəqələrindən cəmləşmə rayonlarına çıxarılaraq ərazidə açılma, atəş mövqelərinin tutulması və qurğuların döyüşə hazır vəziyyətə gətirilməsi üzrə normativləri yerinə yetirirdilər. Şəxsi heyətin çevik hərəkətini, bacarığını, verilən tapşırıqları peşəkarlıqla yerinə yetirdiyini izlədikcə Azərbaycan Ordusunun gücünün və qüdrətinin bir daha şahidi olduq.
Bölmənin zabitləri top komandirlərinə son tapşırıqlarını çatdırırdılar. Onlar da bayraqlarını qaldıraraq hazırlıq barədə məruzələrini edirdilər.
"Araz dur! Hədəf 101 - Piyadalar. Mərmi qəlpələnən, partladıcı qəlpəli, atım azaldılmış. Mindəbirlər şkalası ilə - nişangah 365, taraz 30-10, əsas istiqamətdən sağa 0-83 tuşla. Top komandirləri məruzə edirlər: Birinci hazır… Altıncı hazır. Bölmənin zabiti komanda verir. Əsas topa bir mərmi doldur… Əsas topdan bir mərmi atəş!", - uzaqdan gələn bu komandaların eynisini hələ uşaq yaşlarımda atamın tabeliyində olan bölmənin təlimləri zamanı eşitmişdim. Sonralar təsadüf elə gətirmişdi ki, müddətli həqiqi hərbi xidmətimi də artilleriya bölmələrindən birində keçmişdim. Bir vaxtlar eşitdiyim bu komandaları onda əsgər kimi icra etmişdim. İndi isə eyni əmri eşidənlərin və yerinə yetirənlərin əhatəsindəyəm. Vaxtilə bu əmri yerinə yetirəndə yaşadığım həyəcanı onların da yaşadığını hiss edirəm sanki. Bir azdan top komandiri heyət üzvlərinin hər birinə təşəkkür elan edəcək: "Tapşırıq uğurla yerinə yetirildi!"
Yaranan fasilədə fürsətdən istifadə edib hərbi qulluqçularla həmsöhbət olduq. Atası Azər Dərvişovun döyüş yolunu davam etdirən top komandiri müddətdən artıq həqiqi hərbi xidmət hərbi qulluqçusu çavuş Camal Dərvişov artıq 11 ildir ki, qalib ordumuzun sıralarında xidmət edir, keçirilən təlimlərdə praktiki vərdişlərini artırır. "Heyətimizin hər bir üzvü təlim zamanı bütün normativləri vaxtında və dəqiq yerinə yetirməyə, verilən tapşırıqların öhdəsindən bacarıqla gəlməyə çalışır. Onlar təyin olunmuş yerlərdə həm fərdi, həm də komanda şəklində atəş mövqeyinin normativə uyğun olaraq vaxtında tutulmasında, qurğunun döyüşə hazır vəziyyətə gətirilməsində xüsusi bacarıq göstərirlər. Şəxsi heyətin döyüş hazırlığı ilə yanaşı, mənəvi-psixoloji hazırlığının da yüksək olması vəzifələrinin öhdəsindən daha bacarıqla gəlməsinə kömək edir. Belə vətənpərvər və bacarıqlı əsgərlərlə bir arada xidmət etmək qürurvericidir. Bizim ən mühüm vəzifələrimizdən biri də əsgərləri hərbi bilik və vərdişlərə yiyələnmiş bacarıqlı Vətən qoruyucuları kimi formalaşdırmaqdır", - çavuş C.Dərvişov dedi.
Söhbət əsnasında öyrəndik ki, Camal həm Tovuz döyüşlərində, həm də 44 günlük Vətən müharibəsində iştirak edib, döyüş əməliyyatları zamanı qarşıya qoyulmuş tapşırıqları uğurla yerinə yetirib. O, söhbətinə davam edərək bildirdi ki, artilleriya müharibənin taleyində vacib sayılan qoşun növlərindən biridir və düşmənin darmadağın edilməsində mühüm rola malikdir. “Torpaqlarımızın azad olunması uğrunda gedən döyüş əməliyyatlarında biz bunun bir daha şahidi olduq. Dəqiq atəş zərbələri ilə düşmənin canlı qüvvəsini, döyüş maşınları və texnikalarını, komanda məntəqələrini məhv edərək bölmələrimizin irəliləməsinə öz dəstəyimizi verdik. Təşviş içində qalan düşmən isə çıxış yolunu yalnız qaçmaqda tapdı. Xalqımıza illərdir həsrətində olduğu böyük qələbənin sevincini yaşatdıq. Xoşbəxtəm ki, bu zəfər tarixini yazanların sırasında mən də varam".
Təlimdə heyət nəfərləri öyrəndikləri bilik və bacarıqları layiqincə nümayiş etdirməyə çalışırdılar. Komandirlər üçün də bundan böyük sevinc ola bilməz. Öz bacarıqları ilə komandirlərinə bu sevinci yaşadan müddətdən artıq həqiqi hərbi xidmət hərbi qulluqçusu əsgər Pərviz Abdurrəhmanov da Camal kimi 44 günlük Vətən müharibəsinin iştirakçısıdır. "Müqəddəs və şərəfli peşəmlə hər zaman fəxr etmişəm, bu gün də fəxr edirəm. Hərbi formanı geyindiyim gündən vəzifələrimin öhdəsindən layiqincə gəlməyi, nümunəvi hərbi qulluqçu olmağı qarşıma məqsəd qoymuşam. Keçirilən təlimlər bizə həm təcrübə qazandırır, həm də döyüş qabiliyyətimizi artırır. Yaxşı bilirik ki, döyüş meydanında qazanılan qələbənin təməli təlimdən başlayır. Hər birimiz vəzifə borclarımızı yaxşı mənimsəmişik və istənilən döyüş tapşırığını yerinə yetirməyə, yeni qəhrəmanlıq salnamələri yazmağa hazırıq”, - deyə P.Abdurrəhmanov bildirdi.
Hədəflərin dəqiq nişan alınmasında üzərinə böyük məsuliyyətin düşdüyünü vurğulayan hərbi qulluqçumuz qeyd etdi ki, koordinantlara uyğun olaraq nişangah qurğusunun tənzimlənməsini ən qısa zamanda və düzgün yerinə yetirməlidir.
Abşeron rayonundan ordu sıralarına çağırılan əsgər Fəqan Ələkbərli artıq xidmətinin çox hissəsini başa vurub. O, tərxis olunmağına çox az bir müddət qaldığını, buna baxmayaraq keçirilən təlimlərdə böyük həvəslə iştirak edərək yeni biliklər öyrənməyə çalışdığını bildirdi: "Verilən tapşırıqları layiqincə yerinə yetirib, komandirlərimizdən xoş sözlər eşidəndə sevinirik. Bu, bizim əhval-ruhiyyəmizə müsbət təsir edir. Hər birimiz durmadan çalışırıq ki, dünyanın ən güclü ordularından olan rəşadətli Azərbaycan Ordusuna layiqli əsgər olaq".
Digər əsgərlər Əli Əliyev, Ruslan Abbasov, Rəvan İsmayılov və başqaları ilə də həmsöhbət olduq. Onlar Vətənimizi, torpaqlarımızı qorumaqdan qürur duyduqlarını ağızdolusu vurğuladılar. Hərbi hissədə yaradılan sosial-məişət şəraitindən, komandirlərin onların qayğıları ilə maraqlanmalarından və göstərilən diqqətdən razılıqlarını ifadə etdilər. "Hərbi xidmətə gəldiyimiz gündən ana Vətənimizə olan övladlıq borcumuzu layiqincə yerinə yetirməyi qarşımıza məqsəd qoymuşuq. Buna görə də məsuliyyətlə xidmət edirik. Sosial-məişət şəraitimizin, təminatlarımızın qaydasında olması nümunəvi xidmət etməyimizə əsaslı zəmin yaradır. Təlimlərdə yüksək bacarıq göstərməyimizdə isə komandirlərimizə borcluyuq. Çünki onlar daim qayğımıza qalır, bilik və bacarıqlarını bizdən əsirgəmir, döyüş hazırlığımızı daha da təkmilləşdirməkdə böyük zəhmət çəkirlər".
Hər birimizə məlumdur ki, qurğunun "döyüşə" hazır vəziyyətə gətirilməsi ilə yanaşı, hədəf üçün ilkin göstəricilərin dəqiq hazırlanması da vacib şərtlərdəndir. Bu mühüm vəzifə də bölmənin hesablayıcılarının üzərinə düşür. Təlimdə heyət nəfərləri kimi, hesablayıcılar da zabitin rəhbərliyi ilə öz praktiki vərdişlərini təkmilləşdirirdilər. Onlardan çavuş Vasif Qurbanov, kiçik çavuş Fuad Hüseynov, əsgərlər Heydərəli Xəlilov, Ramazan Qardaşov, Seymur Hacıyev və digərləri qeyd etdilər ki, bölmələrin atəşlərinin ilkin göstəricilərinin dəqiq hazırlanması üçün hesablayıcıların üzərinə vacib vəzifə düşür. "Şərti atəş mövqeyinin və komanda-müşahidə məntəqəsinin koordinantlarını atəşi idarəetmə cihazının üzərinə köçürür, komanda-müşahidə məntəqəsindən gələn şərti düşmən hədəfinə qədər olan topoqrafik məsafəni və dönməni qısa bir zamanda hesablayıb aidiyyəti üzrə məruzə edirik. Əgər kiçik bir səhv etsək, onda hədəfə qədər o göstəricilər yanlış olacaq. Yəni, qurğudan atılan mərmi hədəfə dəyməyəcək. Bu da verilən tapşırığın müvəffəqiyyətlə yerinə yetirilməməsinə gətirib çıxaracaq. Ona görə də biz hər zaman çalışırıq ki, ilkin göstəriciləri dəqiq hesablayaq. Keçirilən təlimlər praktiki vərdişlərimizi daha da təkmilləşdirməyimiz üçün önəmlidir", - deyə onlar bildirdilər.
Hərb tarixinə, eləcə də Azərbaycan Ordusunun həyata keçirdiyi uğurlu əməliyyatlara nəzər saldıqda görürük ki, döyüşlərdə artilleriya bölmələrinin atəş dəstəyi müharibənin taleyini həll edən əsas amillərdən biridir. "N" hərbi hissəsində keçirilən təlim zamanı hərbi qulluqçularımızın yüksək bacarıq və peşəkarlıq nümayiş etdirdiklərini gördükcə bir daha əmin olduq ki, onlar bundan sonra da istənilən hərbi əməliyyatda döyüş tapşırıqlarını müvəffəqiyyətlə yerinə yetirməyə hazır və qadirdirlər.
 
Elçin İMANOV

"Azərbaycan Ordusu",
fotolar

Coşqun CƏFƏROVUNDUR