Ordu quruculuğunun tərkib hissələrindən biri kimi, tibb sahəsi də sürətlə inkişaf edir və hərbçilərimizə yüksək keyfiyyətli tibbi xidmət göstərilməsi məqsədilə müasirləşdirilir. Həyata keçirilən islahatlar nəticəsində yeni tibb müəssisələri açılır, fəaliyyətdə olanlar isə əsaslı təmir olunaraq müasir avadanlıqlarla təchiz edilir.
Hərbi tibb sahəsinin inkişafı ölkəmizin müdafiə qabiliyyətinin gücləndirilməsi və əsgərlərimizin sağlamlığının qorunması üçün xüsusi əhəmiyyət daşıyır. Xüsusilə şəxsi heyətə göstərilən tibbi xidmət ordumuzun döyüş qabiliyyətinin daim yüksək səviyyədə saxlanılmasına imkan verir. Çünki hərbi qulluqçularımızın döyüş və mənəvi-psixoloji hazırlıqlarının yüksək səviyyədə olmasına təsir edən başlıca amillərdən biri də onların sağlamlığıdır. Ordumuzun bütün bölmələrində şəxsi heyətin sağlamlığının qorunması üçün müasir tibbi avadanlıqlarla təchiz olunmuş tibb məntəqələri fəaliyyət göstərir. Burada çalışan tibbi heyət müxtəlif kurslarda iştirak edir, öz peşəkarlıqlarını durmadan təkmilləşdirərək Vətən müdafiəçilərinin sağlamlığının keşiyində inamla dayanırlar. Onlar müayinə və müalicə işini yüksək səviyyədə təşkil edərək hərbi qulluqçularımızın səhhətini daim diqqətdə saxlayırlar. Bununla yanaşı, şəxsi heyəti mövsümi xarakter daşıyan respirator virus infeksiyalarına yoluxma hallarından, eləcə də digər xəstəliklərdən qorumaq üçün müntəzəm olaraq bölmələrdə maarifləndirici söhbətlər aparılır, tibbi profilaktik, dezinfeksiya işləri görülür.
"N" hərbi hissəsinin tibb məntəqəsində də yüksək səviyyədə xidmət təşkil olunub. Otaqlarda təmizlik, səliqə-sahman göz oxşayırdı. Feldşer gizir Vüsal Abdullayev tibb məntəqəsində xidmətin təşkilindən danışdı. "Məntəqəyə müraciət edən hərbi qulluqçular ilk olaraq qəbul otağında qeydiyyata alınırlar. Həkimlərimiz xəstələrin səhhətində yaranan narahatlığı dəqiq müəyyənləşdirmək üçün onlarla söhbət aparırlar. Məntəqəmizin hər bir həkimi müraciət edən hərbi qulluqçuların sağlamlığına xüsusi həssaslıqla yanaşır, şikayətlərini diqqətlə dinləyir, sonra müayinə edirlər. Zərurət yarananda isə xəstə tibb məntəqəsinə qəbul edilir və ona müalicə təyin olunur. Bundan əlavə, mövsümi xəstəliklərdən, viruslardan qorunmağın yolları haqqında onları təlimatlandırırıq. Bütün bilik və bacarıqlarımızdan istifadə edirik ki, hərbçilərimizin sağlamlığında heç bir narahatlıq olmasın. Əsas məqsədimiz onların sağlamlığını qorumaqdır. Çünki xəstələnən hərbi qulluqçu xidmətdən geri qalır, nəticədə bölmənin döyüş hazırlığı aşağı düşür", - gizir Vüsal Abdullayev dedi.
Tibb məntəqəsində hərarət və öskürəkdən şikayətlənərək məntəqəyə müraciət edən əsgər Amil Namazlının müayinə prosesini də izlədik. Vüsal əvvəlcə qəbul otağında əsgərin məlumatlarını qeydiyyat kitabına yazdı, şikayətlərini dinlədi. Hərarətini yoxladıqdan sonra qan təzyiqini ölçdü. Prosesləri izlədikcə hərbi qulluqçumuzun xidmətinə olan sevgisi və peşəsinin incəliklərinə yaxşı bələd olduğu görünürdü.
Məntəqədə müalicə olunan əsgərlər - Ramazan Əşrəfov və Məmmədhüseyn Abdullayevin müalicə prosesləri ilə maraqlandıq. "Burada müalicə alanların hamısına yüksək səviyyədə qulluq və qayğı göstərilir, səhhətimiz daima həkimlərimiz tərəfindən diqqət mərkəzində saxlanılır. Gün ərzində bir neçə dəfə müayinə olunuruq. Bir sözlə, qısa zamanda sağalmağımız və xidmət yerlərimizə qayıtmağımız üçün zəruri işlərin hamısı yüksək səviyyədə görülür. Bütün təminatlarımız kimi, sağlamlığımızın da diqqətdə saxlanılması qalib Azərbaycan əsgərinə göstərilən yüksək etimadın göstəricisidir. Biz də tezliklə sağalaraq bölməmizə qayıtmağa və göstərilən bu etimadı nümunəvi xidmətimiz ilə doğrultmağa çalışacağıq. Hər birimiz qürur duyuruq ki, rəşadətli Azərbaycan Ordusunun əsgərləriyik", - hərbi qulluqçular dedilər.
 
Elçin İMANOV

"Azərbaycan Ordusu",

fotolar

Coşqun CƏFƏROVUNDUR