Ordumuz müstəqilliyimizin və suverenliyimizin qarantıdır, gücümüz, qüdrətimizdir. Bu qüdrətə malik olan dövlətimizin hər qarış torpağı isə bizə əzizdir. Məhz bu qüdrətə, sonsuz sevgiyə görə şanlı tariximiz, qələbə sevincimiz var. Bu əzəli-əbədi qəhrəmanlıq tarixi Vətən sevgisiylə yazıldı. Torpaqlarımızın azadlığı, ərazi bütövlüyümüz və müstəqilliyimiz yolunda mübarizədə gənc oğullarımız döyüşdülər. Azərbaycan bayrağını işğaldan azad edilmiş ərazilərimizdə dalğalandırmaq üçün sinələrini sipər etdilər. Bu şərəfli yola, bu müqəddəs amala bağlılıq yalnız onların həyat hekayəsi ilə kifayətlənmir, eyni zamanda, bir xalqın, bir millətin iradəsinin göstəricisi, milli kimliyimizin, əzmkarlığımızın sübutudur. Hər bir qəhrəmanlıq, hər bir şəhidlik bizə daha böyük bir məqsəd uğrunda mübarizə aparmağı öyrədir. Bu tarixi bizə yaşadanlardan biri də şəhid Xəyal Nəsrəddin oğlu Əlizadədir.
Xəyal 1995-ci il iyunun 2-də Ağstafa rayonunun Vurğun qəsəbəsində dünyaya gəlib. 2002-ci ildə həmin qəsəbədəki Habil Əzizov adına tam orta məktəbin 1-ci sinfinə gedib, 2013-cü ildə orta təhsilini başa vurduqdan sonra hərbi xidmətə çağırılıb. Vətənə övladlıq borcunu uğurla yerinə yetirərək geri dönüb. 2020-ci il sentyabrın 27-də Ermənistan silahlı qüvvələrinin genişmiqyaslı təxribatlarına cavab olaraq başlayan Vətən müharibəsində respublikamızın ərazi bütövlüyü uğrunda gedən döyüşlərdə könüllü olaraq iştirak edib. Döyüş əməliyyatları zamanı qəhrəmancasına şəhid olub.
Xəyal ailənin yeganə oğlu, sonbeşiyi idi. O, iki yaşından atasının himayəsi altında böyümüşdü. Uşaqlıq illərindən ən böyük arzusu Vətən üçün tarix yazanların sırasında olmaq idi. Belə də oldu.
Şəhidimizin evini ziyarət edərək atası Nəsrəddin Əliyev ilə həmsöhbət olduq: "Xəyal uşaqlıqdan ərköyün böyümüşdü. Arzusu torpaqlarımızı düşmən işğalından azad edənlərin sırasında olmaq idi... Çünki o, mənim Şuşaya olan məhəbbətimi, həsrətimi bilirdi. Şuşa işğal olunmamışdan əvvəl bir müddət orada yaşamışdım. Həmişə "Ata, torpaqlarımızı düşməndən azad etmək üçün başlanacaq döyüşlərə qoşulacam, tarixi qələbəni qazananların sırasında mən də olacam", - deyirdi. O, müharibə başlayanda könüllü olaraq müraciət etmişdi, döyüşlərə getmişdi. Deyirdi ki, başını dik tut, ata, mən Vətən üçün gedirəm. Ürəyimdə narahatlıq hissi var idi. Oğlumun şəhid xəbərini ad günümdə aldım. Oğlum müqəddəs amal uğrunda şəhid oldu. Onun şəhid olduğu torpaqlar indi azaddır, üçrəngli bayrağımız Azərbaycanın hər bir bölgəsində olduğu kimi, həmən torpaqlarda da fəxarətlə dalğalanır. Xəyal artıq tək mənim yox, bütöv bir xalqın övladıdır, - şəhid atası bildirdi.
Xəyal Əlizadə Vətən müharibəsi zamanı torpaqlarımızın azadlığı uğrunda gedən döyüşlərdə şəhid oldu və digər şəhidlərimiz kimi, Azərbaycanın qürur tarixində silinməz iz qoydu.
Şəhid Xəyal Əlizadə ölümündən sonra Azərbaycan Respublikasının Prezidentinin müvafiq Sərəncamı ilə “Füzulinin azad olunmasına görə”, “Suqovuşanın azad olunmasına görə”, “Şuşanın azad olunmasına görə”, “Cəsur döyüşçü” və “Vətən uğrunda” medalları ilə təltif olunub.
 
Şəlalə DÜNYAMALIYEVA

"Azərbaycan Ordusu"