Kapitan Sahib Quliyev bütün varlığı ilə özünü hərbi xidmətə həsr edib. O, Cəmşid Naxçıvanski adına Hərbi Liseyə üz tutanda zabit olmağa tələsmişdi. Hələ əyninə kursant libası geyinməmişdi. Sənədlərini vermək üçün liseyin nəzarət-buraxılış məntəqəsində olanda ilk ağlına gələn o olmuşdu ki, nəyin bahasına olursa-olsun, yaxşı hazırlaşıb liseyə qəbul olmalıdı. Ona hərbini sevdirən nəzarət-buraxılış məntəqəsindən içəridəki qərargah binası, tədris binası, sıra meydanı, idman şəhərciyi, bir sözlə, kursant üçün lazım olan hər cür şəraitin yüksəkliyi olmuşdu.
Sahib Cəmşid Naxçıvanski adına Hərbi Liseydə də yaxşı oxumuşdu. Müəllimləri həmişə onun dərsə hazırlıqlı gəlməsindən razılıqlarını aşkar ifadə edirdilər. Bu, digər kursant yoldaşlarının da yaxşı oxumasına, dərsə hazırlıqlı gəlmələrinə bir nümunə idi. Beləcə, liseyi başa vurub indiki Heydər Əliyev adına Hərbi İnstituta qəbul olan Sahib Quliyevin ikinci kursant həyatı başlayır. O, burada liseydəkindən bir il daha artıq oxuyacaqdı. Oxuda da. Kursant illərində zabit və müəllimlərininkeçdiklərini mükəmməl mənimsədi. Bu, onun ilk gündən qarşıya qoyduğu məqsəd idi. Hərbi nizamnamələri daha yaxşı öyrənməyə can atırdı. Yaxşı oxumaqla yanaşı, idmana da mümkün qədər çox vaxt ayırmağa çalışırdı. Hərbçi üçün idmanın ən öndə duran məsələ olduğunu da dərk edirdi. İllər keçdi, Sahib başını qaldıranda gördü ki, artıq kursant həyatına son qoyur. Onun yeni zabit dövrü başlayır. Gənc leytenant kimi ilk xidmət yeri ön xətdə döyüş postu olub. Düşmənlə təmas xəttində xidmət etməyin nə qədər çətin və məsuliyyətli olduğunu yaxşı dərk edirdi.
Cəbhə bölgəsində Sahib Quliyev tabeliyində olan əsgərlərin döyüş və mənəvi hazırlıqlarının artırılması üçün bütün varlığı ilə çalışırdı. Düşmən tərəfindən tez-tez atəşkəsin pozulması artıq Sahibdə də ciddi narahatlıq doğurmuşdu. Bilirdi ki, düşmənə yaxın gələcəkdə mütləq cavab veriləcək. Düşüncəsində yanılmamışdı. 27 sentyabr 2020-ci ildə pandemiyanın tüğyan etdiyi bir dönəmdə düşmən bütün cəbhə boyu təxribata əl atdı. Buna cavab olaraq Azərbaycan Respublikasının Prezidenti, Silahlı Qüvvələrinin Ali Baş Komandanı İlham Əliyev ordumuza əks-hücum əmri verdi. 44 gün davam edən müharibədə 30 ilə yaxın işğalda qalmış torpaqlarımız azad edildi. Kapitan Sahib Quliyev Füzulidən Şuşaya qədər döyüş yolu keçdi. O, komandiri olduğu əsgərlərlə düşmənin postlarını, sursat anbarlarını, kazarma və çoxlu sayda canlı qüvvəsini məhv etdilər.
Kapitan Sahib Həsən oğlu Quliyev döyüşlərdə göstərdiyi xidmətlərə görə Azərbaycan Respublikası Prezidentinin müvafiq sərəncamları ilə "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə", "Şuşanın azad olunmasına görə" medalları ilə təltif olunub.
Sahib bu gün də Vətən qarşısında övladlıq borcunu ləyaqətlə yerinə yetirir. O, tabeliyində olan əsgərlərə hərbi xidmətin incəliklərini həvəslə aşılayır.

Bəxtiyar ƏLİYEV

"Azərbaycan Ordusu"