Ordu quruculuğu ölkəmizin hərtərəfli inkişafının rəmzi, güc və əzmimizin təcəssümüdür. Müstəqilliyimizin ilk illərindən başlayaraq, ordu quruculuğu sahəsində ciddi islahatlar həyata keçirilmiş və bunun sayəsində böyük uğurlar əldə edilmişdir. Bu gün də ordumuz müasir yeni hərbi strategiyaların tətbiqi ilə inkişaf etməkdədir. Azərbaycan Ordusunda xidmət edən hər bir hərbi qulluqçu məsuliyyətini dərk edir, daim bilik və bacarığının artırılması üçün öz üzərində çalışır. Güclü ordumuzun qazandığı zəfərlərdə, əldə olunan nailiyyətlərdə peşəkar hərbçilərimizin böyük rolu vardır. "N" hərbi hissəsində ezamiyyətdə olarkən kapitan Xaliq Əliyevlə tanış olduq. Torpaqlarımızın ərazi bütövlüyünü və suverenliyini qoruyanların sırasında olmağı özünə həyat amalı bilən Xaliq Əliyev Naxçıvan şəhərində doğulub. O, 2007-2010-cu illərdə Heydər Əliyev adına Hərbi Liseydə, daha sonra isə indiki Heydər Əliyev adına Hərbi İnstitutda təhsil alıb. Hərbi təhsilini və müvafiq ixtisas kursunu başa vurduqdan sonra "leytenant" hərbi rütbəsində artilleriya hərbi hissələrinin birində xidmətə başlayıb.
"Hərb peşəsini sevərək seçmişəm", - deyən zabit hərbçi olmağı necə qərar verdiyindən danışdı. "Belə bir məsəl var: "Ya sevdiyin işi gör, ya da gördüyün işi sev". İnsan özünü yaxşı tanımalı, yaxşı anlamalıdır ki, maraqlarının, bacarıqlarının və dəyərlərinin hansı ixtisaslar üzrə olduğunu müəyyən etsin. Hələ kiçik yaşlarımdan hərb sahəsinə olan marağım seçimimdə mənə kömək oldu. Bu gün əminliklə deyə bilərəm ki, sevdiyim işi görürəm. Mənim üçün Vətənə xidmət etmək bütün peşələrdən önəmlidir".
Zabiti Xaliq Əliyev 2020-ci ilin sentyabrında başlayan və ordumuzun şanlı qələbəsi ilə başa çatan 44 günlük Vətən müharibəsinin iştirakçısıdır.
"Bir hərbçi olaraq torpaqlarımızın düşməndən azad edilməsi uğrunda gedən döyüşlərdə iştirak etmək mənim üçün böyük bir qürur mənbəyidir. Bu zəfər bizim ordumuzun gücünün və əzminin sübutu idi. Vətən müharibəsində qazanılan qələbə bizim üçün yalnız bir hərbi uğur deyil, həm də tarixi ədalətin bərpası idi. Qazandığımız zəfərlə ərazi bütövlüyümüzü bərpa etdik. Bu Zəfər Vətən həsrəti ilə yaşayan soydaşlarımızın qəlbində yenidən həyat işığını yandırdı, onlara doğma torpaqlarına qayıtmaq imkanı yaratdı. 44 günlük Vətən müharibəsi isə mənim həyatımda ən böyük dönüş nöqtələrindən biri oldu. Çünki bu müharibə yalnız bir hərbi əməliyyat deyil, həm də Vətənimizin azadlığı və suverenliyi uğrunda mübarizə idi", - deyə zabit bildirdi.
Bu gün ordumuzda Xaliq kimi peşəkar, savadlı və qəlbi Vətən eşqi ilə döyünən zabitlərimiz yetəri qədərdir. Belə vətənpərvər hərbi qulluqçularımızı gördükcə qürur hissi keçirməmək əldə deyil.

Oruc MUSTAFAYEV

"Azərbaycan Ordusu"