Hərbi xidmət hər bir gənc üçün həm şəxsi inkişaf, həm də vətəndaşlıq borcunun yerinə yetirilməsidir. Bu müqəddəs vəzifəni yerinə yetirən əsgərlər yalnız hərbi xidmətlə məhdudlaşmır, eyni zamanda, cəmiyyətə də xidmət edərək Vətənə olan sədaqətlərini göstərirlər. Nümunəvi xidmət göstərən əsgər həm öz şəxsi keyfiyyətləri, həm də Vətənə olan sevgisi ilə digərlərini təmsil edir. Nümunəvi əsgər sadəcə vəzifəsini yerinə yetirməklə kifayətlənməz. Onun hər bir hərəkəti, davranışı və düşüncəsi nümunəvi xidmətini tamamlamalıdır. Bu, hər bir tapşırığı vaxtında və düzgün yerinə yetirmək, həmçinin komanda yoldaşları ilə əlaqələri düzgün şəkildə qurmaq deməkdir. Nümunəvi xidmət edən əsgərlərdən biri də Kamal Əliyevdir.
Əsgər Kamal Əliyev 22 may 2006-cı ildə Cəlilabad rayonunun Göytəpə kəndində anadan olub. Gənc yaşlarından Vətənə sevgi və sədaqət  duyğusu ilə böyüyən Kamal 2024-cü ildə hərbi xidmətə çağırılıb. Xidmətə gəldiyi gündən öz nümunəvi davranışları ilə əsgər yoldaşlarının rəğbətini qazanıb. Əsgər K.Əliyev Vətənə olan dərin sevgisi ilə hərbi xidmətə gəlib. Göytəpə kəndinin vətənpərvər insanlarının əhatəsində böyüyən Kamal hələ uşaq yaşlarından Vətəninin təhlükəsizliyi və inkişafı üçün nələrsə etməyi düşünürdü. O, hərbi xidmətini bir vəzifə deyil, müqəddəs bir borc kimi qəbul edib.
Xidmətinə ciddi, intizamlı və vətənpərvər yanaşması ilə həm komandirlərinin, həm də əsgər yoldaşlarının hörmətini qazanmışdır. K.Əliyevin xidməti müddətində göstərdiyi yüksək əxlaqi keyfiyyətlər milli-mənəvi dəyərlərə sədaqət ruhunda tərbiyə aldığının göstəricisidir. Onun nümunəvi xidməti komandirləri tərəfindən dəfələrlə qiymətləndirilib. Kamalın hərbi xidmətdə qazandığı təcrübə gələcəkdəki həyatı və xidmətləri üçün mühüm zəmin yaratmışdır. Kamal kimi gənclərin hərbi xidmətdə bacarıqlı əsgər kimi formalaşması, vətənpərvərliyi, ordumuza bağlılığı Azərbaycan gənclərinin hərbi xidmətə olan rəğbətinin bir daha bariz nümunəsidir. Bu cür gənclərin varlığı Azərbaycanın gələcəyinin işıqlı olduğunun əyani sübutudur. Onun xidmətini yalnız bir başlanğıc kimi görmək olar. Əminliklə deyə bilərik ki, Kamal gələcəkdə də həm özünün, həm də Vətəninin inkişafına böyük töhfələr verəcək bir şəxsiyyət olaraq yetişəcəkdir.  

Bəxtiyar ƏLİYEV

“Azərbaycan Ordusu”