Əsgərin gündəlik fəaliyyətlərindən biri də növbətçilikdir. Hər gün naryad təyin olunmazdan əvvəl onun təlimatı keçirilir. İstər bölükdə, istər avtomobil parkında, istərsə də digər xidmət yerlərində hərbi qulluqçuların sutkalıq naryadı hərbi hissədə daxili intizamın, səliqə-sahmanın yaradılmasına xidmət edir.
"N" hərbi hissəsində əsgərlərin sutkalıq naryadının aparılması ilə yaxından tanış olduq. Kapitan Əsəd Eminov bildirdi ki, bölükdə hər bir əsgərə xidməti vəzifələri aşılamaq onun başlıca vəzifəsidir. Qeyd etdi ki, əsgər yataqxanasında intizamın, səliqə-sahmanın yaradılması naryadda olan hərbi qulluqçuların əsas tapşırıqlarındandır. "Hərbi hissələrin və bölmələrin daimi yerləşmə yerlərində, düşərgələrdə və döyüş şəraitində yüksək döyüş hazırlıqlı olmalarını, qarşıya qoyulmuş döyüş tapşırıqlarını vaxtında və müvəffəqiyyətlə yerinə yetirmələrini, mühüm hərbi obyektlərin etibarlı mühafizəsini, bölmələrdə daxili qayda-qanunun saxlanmasını, bölmələrin silah və sursatının, əmlakının qorunmasını təmin etmək üçün döyüş və ümumqoşun nizamnamələrinin tələbləri əsasında müvafiq xidmətlər təşkil olunur. Nizamnamələrin tələblərinə uyğun təşkil olunan bu xidmətlərdə günün nizam qaydalarına ciddi riayət olunması, daxili qayda-qanunun saxlanması, silah və sursatın, digər əmlakın qorunması nəzarətdə saxlanılır", - kapitan Ə.Eminov dedi.
Zabit, həmçinin bildirdi ki, bu xidmətlərə əsgərlər növbəli şəkildə təyin olunurlar. Onlar tibbi müayinədən keçirilir, təyin olunduqları naryad növünün vəzifələri öyrədilir və naryada daxil olmazdan əvvəl təlimatlandırılırlar.
Bölməyə daxil olanda bölük növbətçisi qaydalar çərçivəsində zabitə məruzə edərək, şəxsi heyətin harada olması və hansı fəaliyyətləri icra etməsi haqqında məlumat verdi.  Bölük növbətçisi baş əsgər Rauf Hacıyevin dəqiq və səlis məruzəsindən, komandirinin verdiyi suallara cəld şəkildə, əminliklə cavab verməsindən hiss olunurdu ki, o xidməti vəzifələrini yaxşı mənimsəyib və növbətçiliyi düzgün təşkil edir. Həmçinin ərazinin və yataqxananın gözoxşayan   təmizliyi, otaqların səliqə-sahmanı Raufun nümunəvi xidmət aparmasının bir daha təsdiqi oldu.
Baş əsgər Rauf Hacıyev gün növbətçilərinin fəaliyyəti haqqında məlumat verərək dedi:
- Əsgər yataqxanasının girişində, dəhlizdə dolabın yanında dayanan gün növbətçisi yataqxanaya daxil olan hər bir kəs haqqında bölük növbətçisinə: “Növbətçi çıxışa!” - deyə məlumat verir. Bununla bərabər, əsgər yataqxanasının, silah və əşya otaqlarının da mühafizəsini təşkil edir. Gecə-gündüz burada dayanan əsgər ayıq-sayıq olur, müşahidə etdiyi hər bir hadisə ilə bağlı bölük növbətçisini məlumatlandırır.
Gün növbətçisi əsgər Kənan İmanovla həmsöhbət oldum. Kənan Azərbaycan Texniki Universitetinin məzunudur. O, dedi ki, üzərinə düşən vəzifələri mükəmməl öyrənməklə yanaşı, onlara ciddi riayət etməyə çalışır. Hərbi xidmətə gəldiyi gündən Vətən qarşısında övladlıq borcunu vicdanla, şərəflə yerinə yetirməyi qarşısına məqsəd qoyduğunu vurğulayır. Qeyd edir ki, məqsədimə çatmaq üçün komandirlərin öyrətdikləri hərbi bilikləri dərindən mənimsəməyə səy göstərir, bütün gündəlik fəaliyyətlərdə, eləcə də növbətçi olduqda nümunəvi olmağa can atır. Çünki hər birimiz nümunəvi xidmət edərək qalib və rəşadətli ordumuza layiqli əsgərlər olmalıyıq.
...Bölmədə növbətçiliyin və bütün növ fəaliyyətlərin qaydalar çərçivəsində, yüksək səviyyədə təşkil olunduğunu müşahidə etdik. Bütün xidmət növlərinin belə təşkili döyüş hazırlığının yüksək səviyyədə saxlanılmasına xidmət edir.

Bəxtiyar ƏLİYEV

"Azərbaycan Ordusu"