Əsgər Nazim Mehralıyev intizamı ilə komandirlərinin və silahdaşlarının rəğbətini qazanan hərbi qulluqçulardandır. Nazim ona təhkim edilmiş silahın taktiki-texniki xüsusiyyətlərini mükəmməl bilir, komandirlərin tapşırıqlarını vaxtında və dəqiq yerinə yetirir, silahdaşları arasında mehriban və səmimi dost kimi sevilir. Dəfələrlə təlim-atış çalışmalarında uğurlu nəticələr əldə edib. Onun hərbi intizamı, bacarığı, döyüş qabiliyyəti göstərir ki, Nazim hər an döyüş tapşırığını yerinə yetirməyə hazırdır, - zabit Elsevər Manafov onun haqqında belə dedi.
Məşğələ yerində görüşüb həmsöhbət olduğum əsgər Nazim Mehralıyev deyir ki, ona təhkim edilən silahı ilk dəfə hərbi xidmətə gələndə görüb. Ancaq avtomat, snayper kimi üzdə olan silahlar haqqında orta məktəbdə oxuduğu illərdə ilkin məlumatlar öyrənib, natamam söküb-yığmağı da məşq edib. Nazim silah ilə bağlı dedi:
- Silahım haqqında öyrəndikcə onun döyüşdə nə qədər əhəmiyyətli olduğunu dərk etdim. Silahım döyüşdə düşmənin zirehli və başqa texnikalarını məlum məsafədən məhv etmək gücünə malikdir. Həm də əl qumbaraatanından optik və mexaniki nişangahdan istifadə etməklə də hədəfləri sıradan çıxara bilirəm.  
Əsgər silahdan istifadə zamanı təhlükəsizliyə ciddi riayət etməyin də vacibliyini söylədi. Atıcı uzanmış, diz üstə və ayaq üstə vəziyyətlərində silahdan istifadə edə bilər.
Əsgər Nazim Mehralıyev onu da bildirdi ki, hər bir əsgər bölmədə olan atıcı silahları da öyrənməlidir. Bu səbəbdən də Nazim digər silahlar haqqında da müfəssəl biliklər qazanıb. Əsgər yaxşı dərk edir ki, döyüş zamanı ehtiyac yaranarsa, istənilən atıcı silahdan istifadə etmək kimi bir zərurət ortalığa çıxa bilər.
Əsgərin fərdi bacarıqları ilə yanaşı, ruh yüksəkliyi, düşmənlə üzbəüz döyüşmək cəsarəti, yüksək taktiki hazırlığı da onu uğura aparan ən vacib amillərdəndir. Əsgər Nazim Mehralıyevin qeyd olunan bütün bacarıqları özündə cəmləşdirən hərbi qulluqçu olduğunu gördük.

Bəxtiyar ƏLİYEV
"Azərbaycan Ordusu"