Hər bir ixtisasın özünəməxsus önəmliliyi və özəlliyi vardır. Artilleriyada atəşin idarə edilməsi ayrıca bir sahədi. Artilleriyanın idarəetmə cihazı topdan hədəfə olan məsafəni müəyyən edir. Atəşin uğurla başa çatması üçün məsafənin dəqiqliyi vacibdir. Artilleriyaçıların məşğələ yerində baş leytenant Süleyman Ağayevlə görüşdük. O tabeliyində olan şəxsi heyətə dərs cədvəlinə uyğun olaraq məşğələ keçirdi. Heyətlər ərazidə təhkim edilmiş topların yanında idi. Əsgərlər silahı verilən komandalara uyğun səfər vəziyyətindən döyüş vəziyyətinə gətirirdilər. Bir qədər aralıda tək əsgər qarşıdakı masa üzərində çalışırdı, silahdan hədəfə olan məsafəni müəyyən edirdi.
Hesablayıcı əsgər Emin Məmmədov bir ilə yaxındır ki, Quba rayonundan ordu sıralarına çağırılıb. Hərbi xidmətə başladığı ilk gündən top heyətinin üzvüdür. Bir neçə aydan sonra hesablayıcı vəzifəsinə təyin edilib.
Baş leytenant Süleyman Ağayev dedi ki, əsgər Emin Məmmədov bacarıqlı, intizamlı əsgərdir. O, hərbi bilik və bacarıqları tez və yüksək səviyyədə mənimsəyib. Artilleriyaçı ixtisası çeviklik və dəqiqlik tələb edir. Hesablayıcı kimi əsgər Emin Məmmədov vəzifəsinin öhdəsindən bacarıqla gəlir. Ona verilən hədəflərə olan məsafəni dəqiq çıxarmaqla təlim atışında top heyəti tərəfindən atəşin uğurla yerinə yetirməsini təmin edir.
Əsgər Emin Məmmədov dedi ki, hərbi xidmətə başladığım ilk gündən qarşıya məqsəd qoymuşam ki, Vətən qarşısında övladlıq borcunu, şərəflə yerinə yetirim, komandirlərin verdiyi əmrləri vaxtında, dəqiq icra edim, onların öyrətdiklərini dərindən mənimsəməklə nümunəvi xidmətimlə fərqlənim.
Əsgərə verilən topdan hədəfə olan məsafənin çıxarılmasının qısa müddətdə dəqiq yerinə yetirilməsini zabit Süleyman Ağayev yoxladı. Bir neçə bu cür tapşırığın uğurla icra edildiyinin şahidi olduq.
Əsgər Emin Məmmədova xidmətdə uğurlar arzulayıb təlim nöqtəsindən ayrıldıq.

Bəxtiyar ƏLİYEV "Azərbaycan Ordusu"