Aprel döyüşləri həm Azərbaycan Ordusunun gücünü, həm də şəxsi heyətin vətənpərvərlik ruhunu nümayiş etdirdi. Bu döyüşlərdə düşmənlərimizlə yanaşı, bütün dünya ordumuzun necə peşəkarlıq, qəhrəmanlıq, məharət göstərdiyinin şahidi oldu.
Bu döyüşlərdə kapitan Nəcməddin Savalanov da şəhid oldu. 
Nəcməddin Savalanov 1985-ci il fevralın 26-da İmişli rayonunun Göbəktala kəndində anadan olmuşdu. Heydər Əliyev adına Azərbaycan Ali Hərbi Məktəbini bitirmişdi.
2016-cı il aprelin 2-də Qapanlı-Seysulan istiqamətində gedən döyüşlərdə ağır güllə yarası alan kapitan Nəcməddin Savalanov şəhid oldu.
Şəhid kapitan Nəcməddin Savalanov doğulduğu İmişli rayonunun Göbəktala kəndində son mənzilə yola salınıb.
Nəcməddin Savalanov göstərdiyi qəhrəmanlığa görə Azərbaycan Resrublikasının Prezidenti İlham Əliyevin Sərəncamı ilə  ölümündən sonra "İgidliyə görə" medalı ilə təltif edilib.
Bu günlərdə "N" hərbi hissəsinin şəxsi heyətinin bir qrupu şəhid kapitanın məzarını ziyarət edib, ailəsi ilə görüşüb. İctimaiyyət nümayəndələrinin də iştirak etdiyi görüşdə şəhidin döyüş yoldaşları Nəcməddinin igidliyindən, cəsurluğundan, vətənsevərliyindən danışıblar. Ordumuzun əsgər və zabitlərinin Ali Baş Komandanın əmrinə müntəzir olduqlarını bildiriblər.
Şəhidin ailə üzvləri dövlətimizin şəhid ailələrinə göstərdiyi diqqət və qayğısına görə Azərbaycan Respublikasının Prezidenti İlham Əliyevə minnətdar olduqlarını bildiriblər. 

"Azərbaycan Ordusu"