Please ensure Javascript is enabled for purposes of website accessibility
"Ordu ölkəmizin, millətimizin, dövlətimizin, müstəqilliyimizin dayağıdır!" Heydər Əliyev

Xəbərlər

4 Sentyabr 2019 16:58

Şəhidlərin xatirə abidəsinin açılışı olub - VİDEO

Beyləqan rayonunun Qəhramanlı kəndində bölgənin müdafiəsində dayanan Azərbaycan Ordusu hərbçilərinin təşəbbüsü və təşkilatçılığı ilə Azərbaycanın ərazi bütövlüyü, müstəqilliyi uğrunda şəhid olanların xatirəsinə abidə ucaldılıb.
Abidənin açılış mərasimində Müdafiə Nazirliyinin rəsmiləri, Beyləqan və Xocavənd rayon icra hakimiyyətinin rəhbərliyi, hərbi birliyin komandanlığı, müharibə veteranları, ictimaiyyət və şəhid ailələrinin nümayəndələri iştirak ediblər.
Təntənəli mərasimi Müdafiə Nazirliyinin əməkdaşı, Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani açaraq bildirib ki, Vətən uğrunda canından keçən oğulların xatirəsi həmişə əziz tutulur. Möhtərəm prezidentimiz, Ali Baş Komandan cənab İlham Əliyev Azərbaycan gənclərinin respublika toplantısında demişdi: “Azərbaycan əsgəri, Azərbaycan zabiti Vətən uğrunda, torpaq uğrunda canından keçməyə hazırdır”.
Azərbaycan xalqının ümummilli lideri Heydər Əliyevin və torpaqlarımızın azadlığı uğrunda şəhid olmuş soydaşlarımızın xatirəsi bir dəqiqəlik sükutla yad edilib. Hərbi orkestrin müşayiəti ilə dövlət himni ifa olunub.
General-mayor Mayis Bərxudarov, Beyləqan rayon İcra Hakimiyyətinin başçısı Asif Ağayev, Xocavənd rayon İcra Hakimiyyətinin başçısı Eyvaz Hüseynov, Böyük Vətən müharibəsi veteranı Yusif Mərdanov, şəhid Orxan Quliyevin anası Minayə xanım Quliyeva və başqaları çıxış edərək dövlətimizin başçısına, Birinci vitse-prezident xanım Mehriban Əliyevaya, eləcə də Müdafiə Nazirliyinin rəhbərliyinə şəhid ailələrinə göstərilən diqqət və qayğıya görə minnətdarlıqlarını bildiriblər.
Hərbçilərin bu vətənpərvər və xeyirxah təşəbbüsü yüksək qiymətləndirilib.
Abidənin qarşısına əklillər və gül dəstələri düzülüb, şəhidlər ehtiramla yad edilib.