Xidməti vəzifələrini yerinə yetirərkən şəhid olmuş Heydər Əliyev adına Hərbi Liseyin məzunlarının ailə üzvləri və yaxınları ilə kursantların görüşü keçirilib.
Ümumqoşun Ordunun Təlim-Tədris Mərkəzində keçirilən tədbirdə Heydər Əliyev adına Hərbi Liseyin rəisi, general-mayor Məhəmməd Həsənov bildirib ki, ümummilli liderimizin xatirəsinin əbədiləşdirildiyi ilk ünvan kimi Hərbi Lisey gələcəyin vətənpərvər, savadlı və peşəkar zabitlərinin yetişdirilməsi yolunda inamlı addımlar atır. Ötən dövr ərzində Hərbi Liseydə nümunəvi hərbi tədris sistemi, möhkəm maddi-texniki baza yaradılıb. Əsas məqsəd Vətənimizin müdafiəsinə hazırlanan gənclərimizə hərbi işə dair bilik və bacarıqları mənimsətməkdən ibarətdir. Buna görə də Hərbi Liseyə daxil olan ilk gündən kursantlara Vətənə məhəbbət hissi aşılanır.
Tədbirdə Hərbi Liseyin müəllimi Mirismayıl Seyidov və şəhid yaxını Xanəli Kərimli çıxış edərək bildiriblər ki, müxtəlif vaxtlarda düşmən təxribatlarının qarşısını alarkən Heydər Əliyev adına Hərbi Liseyin məzunları böyük qəhrəmanlıq və şücaət göstəriblər. Hərbi Liseyin 8 məzunu Vətənimizin müdafiəsi uğrunda döyüşlərdə qəhrəmancasına şəhid olub. Şərəfli zabit həyatı yaşayaraq gələcək nəsillərə örnək olmaq arzusu bu gün hər bir kursantın həyat amalına çevrilib. Hər bir gənc  də Heydər Əliyev adına Hərbi Liseydə təhsil aldığına görə fəxr hissi ilə özünü əsl vətən müdafiəçisi bilir.
Çıxışların ardından videoçarx nümayiş olunub, kursantlar Vətənimizə həsr olunmuş şeirləri bədii qiraət edib və ədəbi-bədii kompozisiya ilə çıxış ediblər.