“Qafqaz Qartalı-2022” adı altında xüsusi təyinatlı qüvvələrin Gürcüstanda keçirilən hərbi təlimləri başa çatıb.
Oktyabrın 20-də Tbilisi yaxınlığındakı Vaziani hərbi bazasında təlimlərin rəsmi başa çatması ilə əlaqədar tədbir keçirilib.
Mərasimdə Gürcüstanın müdafiə naziri Cuanşer Burçuladze, Azərbaycanın Gürcüstandakı Səfirliyinin hərbi attaşe aparatının rəhbəri polkovnik-leytenant Fuad İbrahimov, eləcə də Türkiyə səfirliyinin və Gürcüstan Müdafiə Qüvvələrinin rəhbər heyəti iştirak ediblər.
Bildirilib ki, Azərbaycan, Türkiyə və Gürcüstan xüsusi təyinatlı qüvvələrinin nümayəndələrinin iştirak etdiyi təlim uğurla başa çatıb.
Qeyd edək ki, oktyabrın 10-da Muxrovani hərbi bazasında təlimlərin açılış mərasimi olmuşdu.
Xatırladaq ki, Azərbaycan, Türkiyə və Gürcüstan xüsusi təyinatlılarının iştirak etdiyi “Qafqaz Qartalı” adlı birgə təlimlər hər il təşkil olunur.