Azərbaycan Respublikası Silahlı Qüvvələrinin bölmələri düşmənin son günlərdəki həmlələrini mərdliklə dəf edərək onu geri çəkilməyə məcbur ediblər. Artıq irəliləyə bilməyən erməni ordu birləşmələri yaşayış məntəqələrimizin və mövqelərimizin atəşə tutulmasını gücləndirmişlər.
Dünən axşam Ağdam şəhəri Gülablı kəndi tərəfdən toplardan və “Qrad” qurğularından atəşə tutulub. Döyüşçülərimiz tutarlı əks-zərbə ilə düşmənin atəş nöqtələrini susdurublar. Dünən Cəbrayıl istiqamətindəki mövqelərimizin atəşə tutulması nəticəsində 2 döyüşçümüz yaralanıb.
Qarabağın şimalında genişmiqyaslı döyüş əməliyyatları getməsə də, ara-sıra atışmalar davam edir. Ötən gecə düşmən Vaquas istiqamətindəki mövqelərimizi atəşə tutub, lakin burada yerləşən topçularımız sərrast atəşlə ermənilərin bu əməllərinin qarşısını alıblar.