Artıq ikinci gündür ki, münaqişə bölgələrində, xüsusilə Qarabağ ərazisində mövqe döyüşləri və atışmalar xeyli güclənib. Dünən Qubadlı rayonunun Başarat kəndi ətrafında döyüşlər zamanı əsgərlərimizdən 1 nəfər şəhid olub, 1 nəfər isə yaralanıb. Laçın rayonunun şimal hissəsində artilleriyaçılarımız hücum cəhdi edən düşmənə ağır zərbələr endirmişlər.
Qarabağın ərazisində mövqe döyüşləri əsasən keçmiş Ağdərə rayonunun cənubunda baş verir. Silahlı Qüvvələrimiz düşmənin bu istiqamətdə keçirdiyi hücumun qarşısını alıb, ona əks zərbə endirərək geri çəkilməyə məcbur etmişlər. Hazırda döyüşçülərimiz Vaquas və Araçadzor yaşayış məntəqələri ətrafında yerləşən erməni qüvvələrini darmadağın etməkdən ötrü döyüş əməliyyatı keçirirlər. Ötən gecə ermənilər Ağdam cəbhəsində yerləşən mövqelərimizi, habelə Cəbrayıl istiqamətindəki bir sıra postlarımızı atəşə tutublar. Bütün hallarda düşmənə layiqli cavab verilib.
Digər münaqişə bölgələrində nisbi sakitlikdir.