Ötən gecə ərzində münaqişə zonalarında mühüm dəyişiklik olmamışdır. Ermənilər əvvəlki kimi bir sıra yaşayış məntəqələrimizi atəşə tutub, imkan tapdıqca mövqelərimizə həmlə edirlər. Azərbaycan Silahlı Qüvvələrinin döyüşçüləri bütün hallarda düşmənə layiqli cavab verirlər.
Dünən bütün günü Laçının azad edilmiş kəndləri Ermənistanın Gorus rayonunun Tex, Karnidzor, Xındzoreks kəndlərindən “Qrad” qurğularından, top və tanklardan, Laçının işğal edilmiş Fətəlipəyə kəndindən isə avtomat və pulemyotlardan atəşə tutulub.
Dünən axşam Ağstafanın Köhnəqışlaq kəndinə Ermənistanın Paravakar kəndindən avtomat və pulemyotlardan atəş açılıb. Ötən gecə Zəngilanın Qazançı kəndi də Ermənistan ərazisindən atəşə tutulub.
Oktyabrın 6-na keçən gecə Ağdam cəbhəsində yerləşən erməni ekspedisiya korpusunun bölmələri Xramort kəndi yaxınlığındakı məntəqələrimizə həmlə ediblər. Döyüşçülərimiz bu həmlələri dəf edərək düşməni geri oturdublar.