Please ensure Javascript is enabled for purposes of website accessibility
"Ordu ölkəmizin, millətimizin, dövlətimizin, müstəqilliyimizin dayağıdır!" Heydər Əliyev

Xəbərlər

30 Aprel 2012 09:00

Lənkəran Əliyev özünə «ədalət keşikçisi» imici qazandırmağa çalışır

General Lənkəran Əliyev, deyəsən, öz günahını anlamaq istəmir və məhkəmənin qanuni qərarını şəxsi maraqlarına uyğun olaraq şübhə altına alır. Nə üçün belə etdiyi özünə daha çox aydındır.
Silahlı Qüvvələrin Təlim və Tədris Mərkəzinin sabiq rəisi, hazırda Silahlı Qüvvələrin Hərbi Akademiyasında həqiqi hərbi xidmət keçən general-mayor Əliyev Lənkəran Əbülfət oğlu onun və ailə üzvlərinin mənzil hüquqlarına Müdafiə Nazirliyinin rəhbərliyi tərəfindən əsassız müdaxilə olunması barədə müxtəlif kütləvi informasiya vasitələrinə açıqlamalar verməklə, cəmiyyət arasında özünə «ədalət keşiksiçi» imicini qazandırmağa çalışır ki, bu da, onun apellyasiya məhkəməsində uduzduğu mülki işə bir növ «ictimai dəstək» qazanmaq məqsədinə xidmət edir. Lakin hörmətli general nəzərdən qaçırır ki, məsələyə hüquqi müstəvidə baxılırsa, verilən informasiyalar müəyyən qədər də olsa faktlara söykənməli, özünün və digərlərinin nüfuzuna, hərbi qulluqçu şərəfinə xələl gətirməməlidir. Buna görə də mən faktlara istinad edəcəyəm.
Azərbaycan Respublikasının Müdafiə Nazirliyinin rəhbərliyinin ünvanına Silahlı Qüvvələrin Təlim və Tədris Mərkəzinin hərbi qulluqçularından, onların ailə üzvlərindən daxil olan çoxsaylı şikayətlər əsasında, Müdafiə nazirinin göstərişilə yaradılmış komissiya tərəfindən, 06 aprel 2009-cu il tarixdən 18 may 2009-cu il tarixədək Təlim və Tədris Mərkəzinin maliyyə-təsərrüfat fəaliyyəti, hərbi qulluqçuların hərbi və döyüş hazırlığı səviyyəsi, hərbi intizama və qanunçuluğa riayət olunması, hərbi qulluqçuların sosial və hüquqi müdafiəsinin vəziyyəti və digər sahələr üzrə yoxlama aparılmışdır. Yoxlamanın nəticələrinə dair general-mayor Əliyev Lənkəran Əbülfət oğlu Azərbaycan Respublikası qanunlarının, hərbi nizamnamələrin və Müdafiə nazirinin əmrlərinin tələblərini kobud şəkildə pozduğuna, tabelikdəki hərbi qulluqçulara qarşı mənəvi və psixoloji təzyiqlərə yol verdiyinə, vəzifəli şəxslərin xidməti vəzifələrinin yerinə yetirilməsinə zəif nəzarət etməsi nəticəsində dövlətə külli miqdarda maddi ziyan vurulmasına şərait yaratdığına görə Müdafiə naziri tərəfindən verilmiş müvafiq əmrə əsasən tutduğu vəzifədən azad edilmişdir.
Yoxlama zamanı hərbi qulluqçulardan daxil olmuş şikayət və izahatlardan məlum olmuşdur ki, Mərkəz rəisi general-mayor L.Ə.Əliyev bir çox zabitlərə qarşı qərəzli mövqe tutmaqla onlara mənəvi və psixoloji təzyiqlər göstərərək, normal şəraitdə xidmət keçmələrinə müxtəlif əngəllər törətmişdir. Belə ki, o, həmin şəxslərə münasibətdə yerli-yersiz olaraq çoxlu sayda intizam cəzaları tətbiq etmiş, onların birdəfəlik pul mükafatlarından məhrum edilməsi barədə qərarlar çıxarmış, attestasiya zamanı aşağı bal ilə qiymətləndirmiş, məharət dərəcəsinin verilməsi üçün sınaq imtahanlarına buraxmamış, növbəti hərbi rütbələrin verilməsi üçün təqdimatlar göndərməmiş və digər qanunsuz hərəkətlərə yol vermişdir.
General-mayor L.Əliyev 2008-ci il ərzində hətta öz müavininə (Mərkəzin sabiq qərargah rəisinə) və tərbiyəvi işlər şöbəsinin rəisinə təkcə «Vəzifəsinə tam uyğun olmaması barədə xəbərdarlıq» növündəki intizam cəzasını müvafiq olaraq 26 və 18 dəfə tətbiq etmişdir. Qeyd olunan hərbi qulluqçularla yanaşı, o, həmçinin, digər 22 nəfər zabit və gizirlərin attestasiyası zamanı xidmətlərini 20 göstərici üzrə mümkün olan 200 baldan yalnız 20 balla qiymətləndirmiş, bunu əsaslandırmamışdır.
General-mayor L.Əliyev, Mərkəz rəisi olduğu dövrdə, tabeliyindəki vəzifəli şəxslərin fəaliyyətinə nəzarəti zəif təşkil etməsi nəticəsində həqiqi hərbi xidmətdən buraxılmış 33 nəfər şəxsin əsassız olaraq şəxsi heyətin siyahısından gec çıxarılması səbəbindən, eləcə də yanacaq, mənzil-istismar, əşya və digər xidmətlər üzrə mövcud olan çatışmazlıq və qanunsuz silinmələrə görə dövlətə ümumilikdə 166 min manatdan artıq məbləğdə maddi ziyan vurulmuşdur.
Bundan öncə verilmiş açıqlamalarda general-mayor L.Əliyevin Təlim və Tədris Mərkəzinin balansında olan dövlət əmlakını mənimsəyərək talaması, bir qrup işçilərə əsassız olaraq pul mükafatlarının ödənilməsi, ona verilmiş xidməti mənzilə, öz vəzifə səlahiyyətindən sui-istifadə edərək, Mərkəzin mənzil komissiyasına qanunsuz göstəriş verməklə göndərdiyi məktuba əsasən yeni order alması və bunun ardınca Mərkəzin hərbi qulluqçuları üçün nəzərdə tutulmuş binanın 114,5 kv.m yaşayış sahəsini zəbt etməsi, habelə Mərkəzin bir nəfər müddətli həqiqi hərbi xidmət hərbi qulluqçusunu döyərək fiziki təhqir etməsi faktlarına bir daha toxunmağa lüzum görmürəm və hesab edirəm ki, ictimaiyyətə bu haqda verilmiş məlumatların təfsilatına təkrarən varmağa ehtiyac yoxdur.
Məlum olduğu kimi, general-mayor L.Əliyev törətdiyi cinayət əməllərinə görə Azərbaycan Respublikası Cinayət Məcəlləsinin 179.2.1, 179.2.3, 179.2.4, 331.3, 341.1 və 341.2.3-cü maddələri ilə cinayət məsuliyyətinə cəlb olunmuş və istintaq zamanı yuxarıda göstərilən onun qanunsuz hərəkətləri şahid ifadələri və digər toplanmış istintaq materialları ilə tam sübuta yetirilmişdir.
Belə bir şəraitdə general-mayor Lənkəran Əliyevin hal-hazırda özünü «haqsızlığın qurbanı» kimi təqdim etməyə çalışması heç də təəccüblü deyil və yalnız təəssüf hissi doğurur. Təəssüf hissi ona görə doğurur ki, general hərbi rütbəsində olan bir şəxsin belə hərəkətlər etməsi nə Azərbaycan Respublikası Silahlı Qüvvələrinin hərbi qulluqçusuna yaraşır, nə də cəmiyyətdə ona hər hansı bəraət qazandırır.

 

Rauf KİŞİYEV
ədliyyə polkovniki
HÜQUQ İDARƏSİNİN RƏİSİ